(کابل ټکی کام ۱۳۹۷ غویی ۳۰)
د برېتانیا چاپ گارډین ورځپاڼې افغانستان ته د نويو برېتانيايي سرتېرو استولو په اړه په یوه تحليلي مطلب کې له انګلیسي مشرانو غوښتي چې خپل ځوانان دې د ټرمپ په غوښتنه په افغان جګړه کې نه قرباني کوي.
د مطلب لیکوال لیکي ، د امریکا په مشرۍ دا جګړه تر ټولو اوږده او خونړۍ جګړه ده چې د نورې نړۍ د پوځیانو په څیر یې سلګونه بریتانوي ځوانان هم د مرګ کندې ته ورټیل وهل او په خبره یې چې “ برېتانیا ته په کار نه ده، چې تر دې ډېر خپل ځوانان د امریکا په غوښتنه د مرګ خولې ته ورکړي“
د ګارډین لیکوال اون جونز په خپل دې کالم کې وړاندې لیکي؛ وروستۍ نظر پوښتنې ښیي چې ٥٦ سلنه برېتانويان په دې باور دي چې افغانستان کې یې پوځي ښکیلتیا ګټه نه درلوده او نه به یې تر دې وروسته ولري.
ګارډین زیاتوي؛ افغان جګړه کې تر یو لک ډېر ځوانان ووژل شول، د ۲۲۰ زرو بهرنیو ځواکونو له ډلې تر نیمايې زبات ټپیان یا هم په رواني ستونزو اخته شول،د سلګونو ملیاردو ډالرو لګولو او په دې هیواد کې زمونږ زیاتې قربانۍ د دې پرځای چې کومه مثبته نتیجه ورکړي، وسلوال مخالفتونه یې زیات او هیڅ مثبته نتیجه یې ورنه کړه.
ورځپاڼه وایي؛ افغان جگړه ناورين دى او دې هیواد ته د نورو ځواکونو لېږل، د انګلیسي تنکيو ځوانانو د وينې قرباني ده چې د امریکایي دیکتاتور(ټرمپ) په مخ کې یې ورکوي .
ورځپاڼه وایي؛ هغوی (امریکایانو) د ترروریز په بهانه پر عراق او سوریې بې رحمانه حملې وکړې، خلک یې ووژل مالي لګښتونه یې وکړل خو نه یواځې خپل هدف ته ونه رسیدل بلکې لا یې مخالفتونه را وپارول.
د ورځپاڼې په باور هغوی اوس په فلسطین کې اور ته تیلی وهي او د پراخولو هڅې یې کوي “ هغوی باید د بریتانیا دفاعي تګلاره ونه ټاکي“
دا په داسې حال کې ده چې تیره ورځ طالبانو هم په یوه اعلامیه کې د برتانيې پر حکومت غږ کړی و، چې د افغانستان په بې ګټې او ناکامه جګړه کې دې ځان له بیا ښکیلتیا څخه وژغوري
طالبانو همداراز ویلي و؛ “موږ په برتانوي ولس هم غږ کوو چې خپل نظاميان او حکومتي چارواکي دې ته پرې نږدې چې د دوی اولادونه بیا د افغانسان جګړې ته را ولیږي، دلته د بې دفاع او مظلومو افغانانو ویني تويي کړي او خپله هم د افغانانو په لاس ووژل شي او په پایله کې بې روحه اجساد، معیوب لاشونه او په رواني ناروغیو اخته په مړژوانده حالت کې بیرته برتانیا ته ستانه شي“
