نعمان لطیف
دکلي بازار کې شور شغپ جوړ وي، څوک اچار رانیسي او څوک مربع، چا هندوانې پنډ کړي وي او چا خټکي او مڼې. دکلي بېؤزله او محتاج کلیوال دهر سړي پنډ او پنډوکي ته په دې هیله گوري چې گواکې یو څه به ترې راکړي خو په شتمن لالا دخیټې هؤس داسې سترگې ورغونجې کړي وي چې دخپل هؤس له اشباع پرته یې په بل څه سترگې نه نښلي.
دسوډان هېواد یو تک تور سوډانی مې همصنفي ؤ؛ کیسه یې کړه چې موږ روژه مات کورونو کې نه کوو. ماښام ته نږدې هره کورنۍ د انگړ ددروازې مخې ته سره کښینو او روژه مات کوو.
ددې لپاره چې دکلي محتاج او بېؤزله او یا مسافر له روژه مات محروم نشي. دې ته وایي مسلماني او ژوندی احساس.
موږ عربي هېوادونه په عیش عشرت کې غرق گڼو او دا دعوه هم کوو چې دنړۍ تر ټولو کلک مسلمانان موږ یو او گیله هم کوو چې څوک مو مرسته او لاس نیوی نه کوي؛ دعربي نړۍ هر شتمن، تجاران او دمارکیټونو مالکان دروژې میاشت کې، په ځانگړو ځایونو کې د افطار الصایم په نوم خېمې دروي او لسگونه مزدورانو او محتاجینو ته روژه مات ورکوي.
منو چې زیات شمېر عرب د اسلامي نړۍ دناوړه حالاتو ذمه دار، او مسلمانانو ته ملامت دي خو له ښو یې باید زده کړو او بد یې بد وگڼو.
زموږ شتمن دروژې میاشت دمالي گټو لپاره دوه او دری میاشتې وړاندې ټارگټ کوي، او خوراکي توکي په دې نیت ذخیره کړي چې بیا یې روژه کې په لؤړه بیه وپلوري؛ زموږ حال ځکه نه بدلیږي او دکلونو راهیسې کړېږو چې موږ دمحتاجه او بېؤزله هلکو له مجبورۍ ناوړه استفادې کوو، او دترحم او عاطفې په ځای ظلم او بدسلوک ورسره کوو.
موږ روژه کې ددنیاوي گټو تلاش کوو، او حال دا چې روژه مسلمانانو ته د اخروي گټو حاصلؤلو طلایي فرصت دی؛ پکار ده روژه کې دمظلوم دعا واخیستل شي، ظالم ته دهدایت او یا هلاکت دعا وکړای شي، دخپل حال دبدلون لپاره لایزال رب ته لاسونه لپه او اوښکې وبهؤلی شي او دشهیدانو، یتیمانو او کونډو رنډو ارمانونه او بې وسه بدنونه ورته واسطه شي ترڅو مو څښتن تعالی حالت ته تغیر کړي.
ابوهریره رضي الله عنه له گران پیغمبر صلی الله علیه وسلم څخه روایت کوي:
درې کسان دي چې دُعا يې نه رد کېږي؛ روژه نيوونکی، تر څو چې روژه ماتوي، عادل بادشا، او مظلوم.
(ابن ماجه)
