(کابل ټکی کام، ۱۳۹۷، غبرګولی ۶) د ملګرو ملتونو د بشري مرستو د همغږۍ اداره “اوچا” وايي، د افغانستان دوه په درې برخه خلک د وچکالۍ له کبله د خوراکي توکو له کمښت سره مخ دي او د هغوی ژوند يې له خطر سره مخ کړی دی.
اوچا په خپل اوونيز راپور کې ويلي، وچکالۍ تر ټولو زيات زيان د افغانستان شمالي سيمو ته اړولی دی زياتوي چې شل ولايتونه د چکالۍ له سخت کړاو سره مخ دي چې کروندې يې وچي شوي (له منځه تللي) او يا هم د وچېدو په حال کې دي.
اوچا وايي، د غور او بادغيس يوويشت زره خلکو د وچکالۍ له امله خپل کلي او کورونه پرېښي او د خوراک د پيدا کولو په موخه هرات ولايت ته کډه شوي دي.
په راپور کې راغلي، د افغانستان په شمال شرقي سيمه کې د يونيم ميليون اوزې او ميږې د خوړو له کمښت سره مخ دي او له زرو کليو څخه يې شپږسوه کلي د اوبو له کمښته شکايت کوي او زوريږي.
اوچا ويلي، په دغو ولايتونو کې د بارانونو او واورو د کمښت ورښت له کبله اوبه کمې شوي د اوبو زېرمې او چينې د وچېدو په حال کې دي.
د ملګرو ملتونو راپور زياتوي، وچکالۍ په دغه هېواد کې د تېر ۲۰۱۷ او روان کال ميلادي کلونو د ژمي فصلونه اغېزمن کړي او اټکل کېږي چې د پسرلي او اوړي فصلونه له يوې مخې له منځه لاړ شي.
د بشري حقونو ياده ادار وايي، چې په بيړني ډول ۱۱۵ ميليونه ډالرو ته اړتيا لري ترڅو وچکالۍ ځپلو خلکو ته خوراکي توکي او پناه ځايونه برابر او د هغوی اړتياوې پوره شي.
