د ټرمپ د واکمنۍ یو کلنه دوره کې امریکایي پوځ ”۵۰۰ ملکي وګړي وژلي“
د امریکا دفاع وزارت کانګریس ته ویلي چې د ډونلډ ټرمپ د ولسمشرۍ په لومړي کال د امریکايي ځواکونو د بریدونو په پایله کې نږدې ۵۰۰ ملکي وګړي وژل شوي دي.
د سي این این ټلوېزون د راپور له مخې، پنټاګان کانګریس ته په خپل رپورټ کې ویلي، دفاع وزارت په تېر ۲۰۱۷ز کال کې په افغانستان، عراق، سوریه او یمن کې د امریکايي ځواکونو د عملیاتو له امله د ۴۹۹ ملکي وګړو د وژل کېدو او د ۱۶۹ نورو ملکي وګړو د ټپي کېدو مؤثق راپورونه ترلاسه کړي.
په یاد رپورټ کې، چې په ۲۰۱۷ز کال کې د امریکايي ځواکونو په عملیاتو کې پر ملکي تلفاتو راڅرخي، ویل شوي دفاع وزارت داسې کره رپورټونه، نه دي ترلاسه کړي چې په صومالیا او لیبیا کې د امریکايي ځواکونو د عملیاتو له امله ملکي وګړو ته اوښتي تلفات وښيي.
په رپورټ کې ویل شوي چې د ملکي وګړو د تلفاتو ۴۵۰ نور رپورټونه لا هم نه دي ارزول شوي، یعني په عملیاتو کې ملکي وګړو ته د اوښتو تلفاتو شمېر زیاتېدای شي.
رپورټ پر ځمکني او هوايي دواړو عملیاتو راڅرخي.
د سي این این د رپورټ له مخې، د ډونلډ ټرمپ د ادارې په لومړي کال په افغانستان، عراق، سوریه، یمن او صومالیا کې د امریکايي ځواکونو هوايي بریدونه زیات شول او په لیبیا کې یې شمېر راکم شو.
د امریکا د هوايي ځواکونو د مرکزي قومندانۍ له لوري له خپرو شویو شمېرو معلومېږي په ۲۰۱۷ز کال کې پر افغانستان ۴۳۶۱ او په عراق او سوریه کې ۳۹۵۷۷ هوايي بریدونه ترسره شوي دي.
د امریکا د هوايي ځواکونو د مرکزي قومندانۍ یو تازه رپورټ ښيي چې د روان ۲۰۱۸ز کال په لومړیو څلور میاشتو کې پر افغانستان نږدې ۱۷۴۸ بمونه غورځول شوي دي.
