(کابل ټکی کام ۱۳۹۷ غبرګولی ۱۳)
د ټاکنو کمیسیون چې په وروستیو کې د فیفا او نورو بنسټونو له خوا د نوم لیکنې په بهیر کې د درغلیو له سختو نیوکو سره مخ دی، اوس وایي چې په ۵ ولایتونو کې تر دې مهاله هیڅ کوم احتمالي نوماند نه دی پیدا شوی چې د راتلونکو ولسوالیو شوراګانو او پارلماني ټاکنو ته ځان د رسمي نوماند په توګه ثبت کړي.
د کمیسیون د خبرپاڼې تر مخه؛ جوزجان، تخار، غزني، کاپیسا او کندوز هغه ولایتونه دي چې د نوماندانو د نوم لیکنې له یوې اونۍ وروسته لا هم کوم نوماند نلري.
بل پلو یاد کمیسیون ویلي چې تر اوسه د افغانستان په کچه ۵۳۷۶ تنو ورسره خپل نومونه ثبت کړي چې یواځې ۶۴ تنه یې پر شرایطو برابر ښوودل شوي.
د کمیسیون د مالوماتو تر مخه؛ په شرایطو برابر کسان تر ډیره د کابل او پکتیکا اړوند دي.
کمیسیون همداراز مني چې هیواد کې تر اوسه ۱۲۰۰ ټاکنیز مرکزونه تړلي او دخلاصون کومه هیله یې هم نشته.
په همدې حال کې ولسي جرګه وایي؛ سټیکرشوې تذکرې اوس د کابل په ګډون په ډیرو ولایتونو کې په ډاګه خرڅیږي چې حکومت هیڅ یې مخه نه نیسي.
کمیسیون وایي ، تر اوسه ۴ میلیونه کسانو ځانونه ثبت کړي خو فیفا او نور بنسټونه یې بې اساسه او غولونکې ادعا بولي او زیاتوي چې د ټاکنو کمیسیون په دې توګه غواړي ځان له مسؤلیته بچ کړي.
