اسراييلي پوځيانو يوه فلسطينۍ نرسه په ډزو وژلې ده
(کابل ټکی کام، ۱۳۹۷، غبرګولی ۱۲) د فلسطيني رسنيو د راپورونو له مخې، اسراييلي عسکرو د جمعې په ورځ د غزې به “خان یونس” سيمه کې په هغو نرسانو ډزې کړي چې د فلسطيني وګړو درملنه يې کوله.
ځايي سرچينو، د غزې د چارواکو له قوله ليکلي د نرسانو له ډلې يوه فلسطينۍ ځوانه نرسه “رزان اشرف النجار” د اسراييلي پوځيانو په ډزو داسې مهال ووژل شوه هغې خپل دواړه لاسونه پورته نيولي و او د نرسانو جامې يې په تن کړې وې.
د فلسطين د روغتيا مسئولین وايي، اسراييلي پوځيانو د غزې په تړانګه کې فلسطينۍ نرسه رزان اشرف النجار په قصدي ډول په ډزو وژلې او څو نور نرسان يې ټپيان کړي دي.
۲۱ کلنې رزان د غزې په تړانګه کې د فلسطيني ټپیانو درملنه کوله چې اسراییلي پوځیانو ډزې پرې وکړې د سينې په برخه کې يې وويشته او ځای پرځای ووژل شوه.
له تل ابيب څخه قدس شریف ته د امريکايۍ سفارت له انتقال وروسته د فلسطين په بېلابېلو سيمو کې د اسرييلو پرضد اعتراضيه غونډې او لاريونونه روان دي چې تر دې دمه د اسرائيلي عسکرو په ډزو ۱۳۲ فلسطينيان وژل شوي او له دوه زرو زيات ټپيان دي.
