چینايي ښوونکو د خپلو زده کوونکو د توجه او نه توجه معلومولو لپاره د مصنوعي ځیرکتیا له ټکنالوجۍ کار اخیستل پیل کړي دي.
د چین د هنګزو ښار په یوه لېسه کې د مصنوعي ځیرکتیا پر ټیکنالوجۍ سمبالې کېمرې، چې د صنف د زده کوونکو ته مخامخ نصب شوې دي، د هر زده کوونکي د څېرې حالات ثبتوي او معلوموي چې ایا زده کوونکی درس ته متوجه دی او که په کومه بله دنیا کې ګرځي.
دا ځیرکې کېمرې په صنف کې ترسره کېدونکي حرکات لکه لیکل، درېدل، ویل، اورېدل، لاسونه پورته کول او ویده کېدل هم پېژني.
دا پرمختللې کېمرې د زده کوونکې څېرې ته په کتلو سره، د هغه د غوسې، ویرې، خوشحالۍ، مایوسۍ، غم، بې فکري او حیرانتیا احساسات ویلای شي.
د دې ټولو معلوماتو تر راټولولو وروسته، دا سیسټم د زده کوونکو د توجه او نه توجه په اړه شننه کوي او، په خودکاره ډول، د هغو زده کوونکو د نومونو لیست برابروي چې درس ته یې توجه نه وي. وروسته دا لېست پر هغه سکرین ښوول کېږي چې یوازې استاد یې لیدلای شي.
د لېسې یوه ښوونکي چینايي رسنیو ته ویلي، ”دا سیسټم د ټول صنف د زده کوونکو حرکات او حالات پېژندلای شي. له شکه پرته، دا د زده کوونکو د توجه معلومولو یوه ډېره ښه لاره ده.“
یادې لېسې د مارچ میاشتې په وروستیو کې له دې ټکنالوجي کار اخیستل پیل کړي، او که ښه پایله یې ورکړه، نو په نورو ښوونځیو او مرکزونو کې به هم ترې کار اخیستل پیل شي.
د لېسې یوه زده کوونکي ویلي، ”له کوم وخت راهیسې چې د ښوونځي ادارې دا کېمرې لګولې دي، داسې احساسوم لکه دوې پټې سترګې چې هر وخت ما څاري او راته ګوري. جرأت نه شم کولای چې خپل ذهن له درس پرته بل ځای په سوچونو کې مصروف کړم“.
ځینو چینايي وګړو د ځوانو زده کوونکو پر دې ډول سختې څارنې نیوکې کړې دي او وايي په دې سره د زده کوونکو اساسي حقوق نقض کېږي. خو کارپوهان بیا وايي چې د دې سیسټم په مرسته ښوونکي د خپلو زده کوونکو حالت، توجه، او زده کوونکو ته د ښوونې خوښ او ناخوښ میتود معلومولای شي.
چین د مصنوعي ځیرکتیا او څېره پېژندونکې ټیکنالوجۍ په برخه کې زیات پرمختګ کړی دی. د چین حکومت په ټول هېواد کې د Skynet په نوم د امنیتي کېمرو جال خپور کړی، چې د څېرې پېژندونکې او مصنوعي ځیرکتیا ټیکنالوجۍ په وسیله د لارویانو په اړه معلومات راټولوي.
ویل کېږي اوس مهال په چین کې ۲۰ میلیونه کېمرې نصب شوې دي او حکومت پلان لري چې تر ۲۰۲۰ز کال پورې دا جال نور هم پسې پراخ کړي.
