(کابل ټکی کام ۱۳۹۷ غبرګولی ۱۶)
د لومړي ځل لپاره تیره ورځ ولسمشر د ملي امنیت شورا په ناسته کې د متحده عرب اماراتو د پوځیانو راتګ منلی دی.
د متحده عرب اماراتو پوځیان چې تر ډیره پاکستاني او د نورو هیوادونو اتباع دي هڅه به وکړي تر څو د غوڅ ماموریت په چوکاټ کې افغان ځواکونو ته د مشورو ورکولو سربیره په جګړییزو ډګرونو کې هم د هغوی ملاتړ وکړي.
د ارګ د خبر پاڼې سره سم، دا ځواکونه د سوفا د موافقتنامې د سند پر اساس راځي او تیره ورځ د اشرف غني په مشرۍ د ملي امنیت شورا له خوا یې راتلل تائید شول.
واک ته د امریکا د نوي ولسمشر له رسیدو سره سم امریکا په افغانستان کې د بهرنیانو د جلبولو پراخې هڅې پیل کړې چې په دې لړ کې د امریکا یو شمیر نږدې عربو هیوادونو هم ژمنه کړې چې د واشنګټن د غوښتنې پر اساس به کابل ته یواځې دومره سرتیري استوي چې د دوی حضور ثابت کړي.
امریکا په دې توګه غواړي ځان په سیمه کې د لویو رقابت کونکو هیوادونو (چین او روسیه) له ملامتۍ او نیوکو وژغوري او په خلاص مټ خپل فعالیتونو ته ادامه ورکړي.
