(کابل ټکی کام ۱۳۹۷ غبرګولی ۱۷)
د ناټو یو لوړپوړي غړي ویلي؛ د ناټو اتحاد مشرانو د قطر هغه وړاندیز رد کړی، چې ګواکې دا هیواد به د ناټو د یو غړي په توګه راڅرګند شي.
د ناټو سازمان دې غړي چې له نوم اخیستلو یې ډډه کړې، د فرانسې خبري اژانس ته ویلي، د اروپایې اتحادیې د لسمې مادې ترمخه؛ له اروپا پرته یواځې واشنګټن کولی شي د دې سازمان غړی شي، بل هیواد نه شي کولی د ناټو د سازمان غړیتوب تر لاسه کړي.
د قطر د دفاع وزیر خالد العطیه د څلور عرب هیوادونو له خوا د دې هیواد د محاصرې په لومړۍ کلیزه کې ویلي و، په سیمیزه کچه دوحه د وسلو او مهماتو د راکړې ورکړې او تجهیزاتو د برابرولو د یو لوی هیواد په حیث بدل شوی، او هیله لري د شمال اتلانتیک د هیوادونو په قطار کې ځان ثبت کړي.
هغه د الطلائع خپرونې ته ویلي و، موږ د ناټو سازمان سره له نږدې اړیکې لرو او هیواد مو د دې سازمان د څو لیوا ګانو کوربه توب هم کوي.
سعودي، بحرین، مصر او متحده عرب اماراتو تیرکال له دې هیواد سره په ټولیزه توګه ټولې سیاسي، تجارتي او فرهنګي اړیکې پریکړې .
همداراز یې د حج په موسم کې د دې هیواد پر حاجیانو هم بندیز ولګاو او د دې اجازه یې ور نه کړه چې د قطر الوتکې د خپلو حاجیانو دلیږد په موخه جدې ته پرواز وکړي .
قطر له نورې نړۍ سره اقتصادي اړیکې پیاوړې او لا پراخه کړې او د نوموړو څلورو هیوادونو د بندیزونو پر خلاف مقابله کوي، چې د ناټو غړیتوب ترلاسه کول یې د دې لړۍ یوه هڅه ده.
