د لویدیځو هیوادونو شنونکي د طالبانو او حکومت تر منځ د دوه اړخیز موقت اوربند په تړاو ویشلي نظرونه لري او دې اوربند ته د حیرانتیا په سترګه ګوري.
د ویلسن د اکاډمۍ څیړونکی مایکل کوګلمن وایي، د طالبانو له خوا اعلان شوی ۷۲ ساعتیز اوربند بیخي حیرانونکی ګام دی، خو داچې دا ډله لا هم د بهرنیانو د نظامي حضور مخالفه ده، اټکل نه کوي چې دا اوربند به د دایمي سولې باعث شي.
د بحران د نړیوال سازمان څیړونکی برهان عثمان بیا دا اوربند هیله بښوونکی بولي او زیاتوي؛ که دواړو لوریو ځینې انعطافات وښودل، یاد اوربند به د یوې سولیزې فضا راوستلو ته لار هواره کړي.
یو بل امریکایي څیړونکي وایي؛ چې طالبانو د اوربند په اعلان سره دا وښودله چې دا ډله لا هم یوه واحده قومانده لري او ټول افراد یې په پوره اطاعت سره راټول دي.
نوموړی زیاتوي ؛ د دواړو غاړو اوربندونه کولی شي خپلمنځي اعتماد ته لار هواره کړي.
باید وویل شي چې ګډحکومت د روژې له ۲۷ د اختر پنځمې او طالبانو د اختر درۍ شپې اوربند اعلان کړی.
طالبانو له خپل اوربند څخه نړیوال ځواکونه او حکومت بیا د داعش او القاعده ډلې مستثنا کړې.
د دې تر څنګ طالبانو ټولو نیول شویو دولتي کسانو ته هم د خوشې کیدو اعلان کړی په دې شرط چې بیا به د دولتي ځواکونو لیکو ته نه ورځي.
