لیکنه حافظ عمری اسیر
د فیسبوک پاڼه چی خلاصوم لومړی خبر د اوربند او ډزبندۍ وینم، خوښ شم روح می ښاد شی ستاینه یی کوم.
د افغان ولس لپاره یی د بري ستر زیری بولم الله تعالی دې همدا دری ورځنی اوربند په دری پیړیو بدل کړي او الله تعالی دې عامه او افغان شموله سوله راولی چی هر قوم ته پکی برخه وجود ولري.
خو د یوه بندي یوې خبرې سخت وزورولم او هغه دا چې ویل یی که حکومت زموږ سره موافقه وکړي او د اختر دا دری ورځی مو ایله کړی په الله قسم بیرته په ځوانۍ هم ورته راځو.
دا خبره خو څرګنده ده چی افغان اولس د ارمانونو په سخته غیږه کی دی لکه څنګه چی ازاد خلک د دریو ورځو اوربند ته خوښ دی نوهمدغه راز بندیان یی هم بیا د عفوی او تخفیف په تلوسه کې دی له ټولو هیوادوالو او بشري ټولنو نه هیله کوم چی موږ محبوسین هم د دې تاوده او ګرم اور ښکیله برخه یو غواړو ستاسی په څیر د اوربند نه موقتًا درې ورځې مزه واخلو کنه نو موږ محبوسین به څنګه خوشالی وکړو؟
دوستانو!
که زموږ ږغ هم راسره بدرګه کړئ لکه څنګه چی د طالبانو مشر محترم شیخ هبة الله صیب په دی منظور چی افغان عسکر د خپل اولس بولي نو ځکه یی لا وار د مخه د خوښۍ زیری ورواوراوه باید موږ هم د حکومت په زندانونو کی بی برخی پاتی نشو.
د رمضان مبارکی میاشتی نه څو ورځی مخکی د هیواد د ستر زندان پلچرخی محبوسینو په اجتماعی ډول په اعتصاب لاس پوری کړ د اعتصاب کولو عوامل خو متعدد وو چی له مهمو ټکو څخه یې یو دا و چی باید هغه بندیان چی خاص جرم ونلری سیاسی بندیان وي او د جرایم امنیت داخلی او خارجی په تور تورن وی اعدام دې یې په قید بدل شي.
دوهم طالب بندیان لکه څنګه چی د تیر رئیس جمهور حامد کرزی په وخت کی دوی هم د تخفیف اوعفوی نه په استفادې هر فرمان کی د نورو بندیانو په حیث کافی ونډه درلودله خو اوسنی رئیس جمهور محمد اشرف غنی په هغه باندی قید لګولی او د هر فرمان نه یی طالب بندیان د عفوی او تخفیف نه مستثنا کړي دي .
آیا د مقابل لوری په زړونو کی ځای نیول به دا قسم سیاست او داسی وضعیت مثبت تأثیر ولری که منفی بلکی د یوه بندی په وجه د هغه کورنۍ خو څه چی ټوله قریه د دولت سره په کرکه او نفرت کی لویږي .
موږ په خپل اعتصاب کی زیات تمرکز پر دې هم درلود چی باید کوم چی د دولت له مخالفو صفوفو نه د دښمن په لاس نیول شوی بندیان دی باید د عامو بندیانو په څیر دوی هم د فرمان یوه برخه وګرځول شي.
حتی وموغوښتل چی دا خبری د عفوی د نړیوال سازمان سره هم شریکی کړو خو دا چی د ظلم دوران دی یواځې جابر ته حاکمیت او اعتبار ورکول کیږی او د مظلوم غږ که هرڅومره تیز او توند هم وی خو بیا هم غوږونه تری کاڼه شوي دي.
مشران راغلل د بندیانو نمایندګانو ورسره خبری وکړی خو کله چی دولتی منسوبینو خپل اعتبار د اولس او ملت په وړاندی له لاسه ورکړی نو ځکه د دوی په وعدو محبوسین قانع نه شول نو بیرته ولاړل.
د دوهم ځل لپاره بیا د اولسی جرګی ځینې غړی چی د هلمند د خلکو استازي او د سنا مجلس حقوقی مدافع الحاج محمد هاشم الکوزی هم ورسره وو د زیاتو تأکیداتو او مؤثقو وعدو وروسته بندیانو ورسره توافق وکړ او اعتصاب یی مات کړ.
بیا بندیانو تری د شلو ورځو الی یوی میاشتی پوری غوښتنه وکړه دوی هم ژمنه وکړه چی په همدی نیټه کی به تاسو ته مثبت ځواب درکوو او ستاسو ستونزی به هواری شی خوبیا هم تر دی دمه یی کومه نتیجه نده معلومه شوې.
محترم رئیس جمهوره!
که غواړی اولس راخپل کړئ نو بندیان اصل اولس دی ځکه د هیواد د هری قریی او که ووایو د هر کور نه یو بندی شته مبالغه به نه وي په زندان کی د بندیانو سره اضافه احسان که څه هم ونکړی خو کوم حقوق چی د افغانستان اساسی قانون ورکړی دی پر هغو قوانینو دی ورسره معامله وکړای شي اوبس.
د هیواد له ځوانانو او سپین ږیرو قومی مخورو ټولو نه هیله کوم چی زموږ په اړه بی تفاوته پاتی نشي.
