جاپان: زلزلې مالي او ځاني زیانونه اړولي دي
(کابل ټکی کام، ۱۳۹۷، غبرګولی ۲۸) د راپورونو پر بنسټ، نن سهار په جاپان هېواد کې زلزله شوې چې له کبله يې درانه مالي او ځاني زيانونه اړولي دي.
د جاپان د هوا پيژندنې ادارې ويلي، د زلزلې شدت ۴.۷ درجې و او مرکز يې د یاد هېواد جنوبي ولايت ګونما کې د ځمکې لاندې په شل کيلو مترۍ کې ښودل شوی دی.
د هوا پېژندنې ادارې مسئولين وايي، د جاپان د پلازمينې په شمول په ديارلس ولايتونو کې د زلزلې ټکانونه محسوس شوي دي.
له بله پلوه د رويټرز خبري اژانس ويلي، چې نن سهار د اتو بجو په شاوخوا کې د ياد هېواد په اوساکا ښار کې د زلزلې له کبله څلور کسان مړه شوي او دوه سوه زيات ټپيان دي.
د سرچينې په وينا، د زلزلې د شدت له کبله لسګونه ودانۍ نړېدلي او د ۱۷۹ زره کورونو برېښنا پرې شوې ده.
چارواکي وايي، د زلزله زپلو سيمو او خلکو سره د مرستو لپاره بيړنۍ مرستې پيل شوي دي.
