(کابل ټکی کام ۱۳۹۷ غبرګولی ۲۸)
په داسې حال کې چې طالبانو خپل درۍ ورځنی اوربند تیره ورځ پای ته ورساوو او خپلو جنګیالیو ته یې حکم وکړ چې سنګرونو ته بیرته ستانه شي، د ملي دفاع وزارت وایي چې ښارونو ته ورغلي طالبان بیرته خپلو سنګرونو ته نه دي تللي.
محمد رادمنش له آزادۍ رادیو سره په خبرو کې ویلي؛ د هیواد مختلفو ښارونو ته شاوخوا ۲۴۰۰بې وسلې طالبان ننوتي و، چې امنیتي ادارو یې نومونه ثبت او راجستر کړي او بیرته خپلو مواضعو ته نه دي تللي.
پر همدې مهال بیا یو شمیر سرچینو روښانه کړې؛ کوم طالبان چي د اوربند په بهانه ښارونو ته تللي ، هغوی هلته پاتې شوي ترڅو په راتلونکي کې په امنیتي ځواکونو او د بهرنیانو پر مرکزونو کارنده بریدونه ترسره کړي.
دا په داسې حال کې ده چې طالبانو له وړاندې د کابل او ټولو ښارونو اوسیدونکو ته خبر ورکړی و، چې د بهرنیانو له استخباراتي او پوځي مرکزونو لرې اوسي ځکه دوی د الخندق په نامه عملیاتو کې یواځې په همدې اهدافو چې د مقابل لوري مهمې هستې یې بللې، تمرکز کوي.
بل پلو سرچینې وایي چې طالب مشرانو خپلو هغو افرادو ته د دسپلني سزا خبره کړې چې په وینا یې د خلکو په تجمعاتو او غونډو کې یې برخه اخیستې او د دوی د شتون له امله لسګونو ولسي خلکو ته مرګ ژوبله واوښته.
طالبانو ویلي؛ دوی له وړاندې خپل افراد په دا ډول غونډو کې له ګډون څخه منع کړي و، ترڅو د ممکنه هوایي بریدونو او مرموزو چاودنو له امله دوی د ولسي مرګ ژوبلې عامل جوړ نه شي.
د یادونې وړ ده چې په ننګرهار کې د طالبانو ولسي خلکو او امنیتي ځواکونو په ګډو ناستو د داعش ډلې دوه ځله مرګوني بریدونه وکړل چې تر ۱۶۰ زیاتو کسانو ته په کې مرګ ژوبله واوښته.
