کابل ټکی کام ۲۹لېندۍ/۱۳۹۴، فرید احمد
طالبانو د تیر په څېر یو ځل بیا یوه پروپاګنډيي ویډیو نشر ته سپارلې ده چې د هلمند ولایت د خانشین ولسوالي تر خپلې ولکې د لاندې راوستو انځورونه او جنګي صحنې پکې راوړل شوي دي.
په ویډيو کې طالبان په سپکو او درنو وسلو سمبال په پوره زړورتیا د خانشین ولسوالۍ ته ننوزي او هلته په پوره نظم او ډيسپلین سره خپلو ملګرو ته سپارښتنه کوي ترڅو د دولتي تاسیساتو محافظت وکړي او څوک پرینږدي ملکي او دولتي ملکیتونو ته زیان واړوي.
په ویډيو کې د خانشین ولسوالۍ له خلکو سره وړې مرکې شوې دي چې هغوی طالبانو ته خوښ ښکاري او د دولتي ځواکونو څخه سر ټکوي.
دغه ویډيو چې ۵۰ دقیقې ده د طالبانو د الااماره سټوډيو لخوا نشر ته سپارل شوې ده.
د ويډیو په پای کې د ستر دیني عالم شیخ الحدیث مولنا خلیفه دین صاحب چې یو صوفي مرشد دی وینا راوړل شوې ده چې د طالبانو جنګیالیو ته پکې د نصیحت په شکل خطاب شوی دی.
دین محمد خلیفه صاحب ویلي دي چې مسلمانان باید بیدار واوسي تر څو کفارو ته وخت ورنکړل شي چې د دوی په منځ کې تفرقه واچوي، او هغه عزت چې افغانانو ته ورکول کیږي زمونږ له لاسه ورنکړي.
دی زیاتوي، په داسې حال کې چې د امارت مشایخو علماوو د ملا اختر محمد منصور اخوند سره بیعت کړی دی او هغه یې خپل امیر منلی، نو په ټولو لازمه ده چې بیعت ورسره وکړي، او امر ته یې تابع و اوسیږي.
د ملا اختر محمد منصور اخوند په صفت کې یې ویلي دي چې د مشر امیرالمؤمنین رحمه الله په نه شتون کې یې هم بیا امارت داسې پر مخ بوتلو چې هیڅ څوک هم پرې پوه نه شول، چې آیا امیرالمؤمنین رحمه الله شته او کنه؟
دین محمد خلیفه صاحب وایي، «کله چې رسول الله صلی الله علیه وسلم ته د حدیبیې په صلح کې څو ځله مشران راغلل، خو صلح ونشوه، خو کله چې د مشرکینو له لورې څخه سهیل ورته راغی نو نبي علیه الصلاة والسلام مخکې د هغه له راتګ څخه وویل چې (سهل الامر) یعنې کار نور اسانه دی، داسې فتح وشوه چې فتح مبین ورته وویل شول، نو زه هم د منصور صاحب له نوم څخه نېکپالي نیسم او وایم چې خدای پاک به یې نصرت نصیب کړي.»
چې په لاندې لېنکونو یې ترلاسه کولی شئ!
