کابل ټکی کام احمدالله مهاجر
تېره ورځ د هلمند ولایتي شورا په ډاګه کړې ده چې که مرکزي دولت ورسره مرسته ونکړه، نو لرې نه ده چې دغه ولایت هم د کندوز له برخلیک سره مخ شي
له څو ورځو را هیسې د هلمند په ځینو ولسوالیو کې د طالبانو او افغان ځواکونو تر منځ درنده جګړه روانه ده، چې د خبرونو پر بنسټ ویلی شو، د افغان ځواکونو په نسبت طالبان ډېر قوي دي، او هر ګام یې د پرمختګ په لور دی.
د هلمند ولایتي شوراء چارواکو مرکزي دولت ته خبردارۍ ورکړی دی، که د دغه ولایت امنیت ته په جدي توګه پاملرنه ونشي، نو لرې نه ده چې دغه ولایت دې هم د کندوز برخلیک سره مخ شي.
د هلمند ولایت د ولایتي شوارء امنیتي کمېټې مشر ښاغلی بشیر احمد شاکر رسنیو ته ویلي دي چې له تېرو ورځو را هیسې دغه ولایت ته امیتي ګواښونه زیات شوي دي، چې اوسمهال د دغه ولایت شاوخوا ۷۰سلنه خاوره د طالبانو تر کنټرول لاندې ده.
ښاغلی شاکر وايي، «یواځې د هلمند ولایت ۴ولسوالۍ د دولت په ولکه کې دي.»
همدا راز د هلمند مرستیال والي د فیسبوک له لارې ولسمشر غني ته په یوه پرانیستي لیک کې خبردارۍ ورکړی دی چې په تېرو دوو ورځو جګړو کې یې لږ تر لږه ۹۰ سرتیري وژل شوي دي.
په لیک کې ویل شوي دي چې د هلمند درې ولسوالۍ خو وړاندې د طالبانو په ولکه کې وې، خو اوسمهال د سختو جګړو له کبله دوه نورې ولسوالۍ هم د سقوط په حال کې دي.
له بلې خوا څو ورځې وړاندې په ولسي جرګه کې د هلمند د خلکو استازي جبار قهرمان ویلي وو چې «د هلمند نا امنه کېدل به د ټولې جنوبي حوزې پر امنیت منفي اغېزه وکړي.»
