عزام حقاني
افغانان نن په یو داسي حالت کي قرار لري چې رڼا ورته تیاره او تیاره ورته رڼا معلومیږي ، خلاصون ته د هلاکت او هلاکت ته دخلاصون په نظر ګوري. روښانه تاریخ یې مخ ته پروت دی عبرت او گټه ورڅخه نه اخلي، داسي چاته دامید په نظر ګوري چې هغه یې اصلي دښمن دی.
عجیبه ده د یو داسې هیواد وګړیو خو به بیا هیڅکله تیروتنه نه کوله کوم چې یو شی بار بار تجربه کړي. درې ځلې انګریزانو زموږ هیواد اشغال کړ او یو ځلي روسانو اشغال کړ او دادی اوس امریکایانو تر خپل تسلط لاندي راوستی ، خو دوی لا دوست او دښمن ونه پیژندی، هر وخت د دښمن په غولوونکو شعارونه خطاسوي دي، خو چې کله بیا له عین قضیې سره مخ شي بیا یې تیر هیر کړي وي او دیو څو پیسو لپاره دبل دښمن دلاس اله شي، او دنوی دښمن ډول ته اتڼونه کوی ، په همدي مورد رسول الله صلی الله علیه وسلم مسلمانان څورلس سوه کاله مخکي خبر کړي چه ( لایلدغ المؤمن من جحر واحد مرتین) متفق علیه. یعني یو مؤمن له یوه غار څخه دوه ځلي نه چیچل کیږي. خو مسلمانان سره له څراغه بیا هم په کندو کي لویږي ، دښمن هغه دښمن وي خو پوست یې بدل اغوستی وي، او نوم یې ځانته بدل ایښی وي،
نو ددي ټولو تجربو باوجود بیا همغسي عمل کول په دي دلالت کوي چي داخلک دعقل او فکر په ړوندوالي اخته دي، که دعقل ړوندوالی نه وي نو څه دي چي د رڼا او څراغ سره سره بیا هم د ظلمت او هلاکت په کندو کي لویدلي، کوم څوک چی یې دنجات او سوکالۍ په لار بیایي هغه ته دازلي دښمن او ازلي دښمن ته دوست او سوله راوستونکي په نظر ګوري.
دسترګو نابینا خو ښه وي چاته یې زیان نه رسیږي خپله که هر څومره په تکلیف وي
خو دعقل او فکر ړانده دیو پوره ولس د له منځه تللو او هلاکت سبب ګرځي .
دادی یو ځل بیا د تیر په څیر د انتخاباتو او ټاکنو په نوم تجربه شوې او ازمویل شوې جعلي پروسه باندې کار شروع ده او ښه په دزر سره مخ په وړاندې روانه ده ، هغه زاړه ازمویل شوي وکیلان دي او هغه کاذب شعارونه یې دي کوم چې څوځلې پخوا یې هم دا ړوند ولس په تیر ایستلی وو او بیا وروسته د کامیابۍ نه هیڅ هم په عملي میدان کې چا ونه لیدل.
عجیبه ده یو هوښیار کس به څنګه زړه ښه کړي چې راشي او رأیه ورکړي ځکه په تیر ځل ټاکنو کې د افغانانو رایې او نظر ته هیڅ احترام ونشو ، بلکه د مشرۍ او زعامت لپاره د امریکا د بهرنیو چارو د وزیر جانکیري لخوا په کابل کې د امریکا په سفارت کې دوه کسان انتخاب او د ملي وحدت په نوم حکومت یې رامنځته کړ ،
چې دافغانستان په تاریخ کې تر ټولو ناکامه او د پردیو ګټو ته ژمن حکومت ده.
او هم په تیرو پارلماني ټاکنو کې هغه څوک واک ته ورسیدل کومو چې د بهرنیو سفارتونو سره ښه له نژدې دوستانه اړیکې درلودې او هم هغوی ته وفاداره وو.
خو افغانان په مجموع کې بیا هم ځان نه پوهوي او عارفانه تجاهل کوي چې داشغال او یرغل او یا دپردیو تر واک لاندي هیواد کې دهغه ولس او خلکو نظر ته کوم احترام نشته بلکې په اشغال شوي ملک کې انتخابات یو جعلي ، غولوونکې او اشغال اوږدوونکې پروسه ده ، چې نور هم دهغه هیواد او خلکو ستونزي او مشکلات ډیروي او د اشغال د دوام لپاره زمینه سازي کوي.
په داسې حال کې چې دلته د ټولو ستونزو او مشکلاتو جرړه امریکایي اشغال او د امریکا حضور دی ، که په ریښتیا هم دا نوماندان ددې خلکو نماینده ګي کوي اود زیات شمیر افغانانو اساسي او عمده غوښتنه هم داده چې له ګران هیواد څخه د اشغالګرو لمن ټوله شي.
ایا کوم کاندید او نوماند په خپل شعار کې دا الفاظ ځای کړي دي چې “د امریکایانو ایستل زما لومړی هدف دی؟؟؟ نه هیڅکله نه.
نو زما په اند هغه کس چې په میلونونو روپۍ د دې لپاره مصرفوي چې ځان یو موقف او چوکۍ ته ورسوي په هیڅ صورت د دې جوګه نه دی چې بیا ملت او ولس ته خدمت وکړي ځکه دی مجبور دی چې مصرف کړې پیسې به د مظلوم او بیچاره ولس په غوښو باندې روپي په روپي جمعه کوي.
اخیر تر کله؟؟
هر ځل همدا کاندایدان او دا غوړې غوړې او لویې لویې وعدې دي چې دې سرنا خلاص ولس ته یې ور کوي خو کله چې اخور یعني هدف ته ورسیږي نور دی او کنجاړه سره پیدا کړي او د هغې په خوړولو او ذخیره کولو خپلې ټولې کړې وعدې هیرې کړي.
دا ځکه چې په اشغال شوي او د پردو تر تسلط لاندې هیواد کې وطن ، دین او ولس ته وفادار او مخلص کس نه ځان کاندیدوي او نه کامیابیږي.
تجربو ثابته کړې ده چې د اشغال تر سیطره لاندې هیوادونو کې انتخابات او د ټاکنو په نوم څه کول د هغه هیواد د خلکو احساسات او ولولې په نطفه کې وژني ، ځکه همدا انتخابات او ټاکنې دي چې اشغالګر خپل وحشت او بربریت ښه په زړورتیا سره کوي ځکه د توجیه لپاره یې خپل روزلي غلامان د انتخاباتو له لارې په ولس باندې تپلي دي.
همدا راز په اشغال شوي هیواد کې ټاکنې د هغه هیواد د خلکو ستونزي او مشکلات د ختمولو پر ځای نورې هم زیاتوي ځکه د همدې ټاکنو له امله اشغال ته زمینه سازی کیږي چورلټ او واضح یرغل ته یو او بل نوم ور کول کیږي ، ددې پرځای چې هیوادوال د یرغلګرو په ضد قیام وکړي د انتخاباتو په نوم تیر ایستل کیږي چې ستاسو په خوښه به نظام جوړیږي او هغه څوک به ټاکل کیږي کوم چې ستاسو خوښ وي.
بیا هم یادونه کوم چې نن ورځ
دانتخاباتو له لاري اشغال ته قانوني بڼه ورکول کیږي لکه څنګه چې یې د ستراتیژیک تړون په لاسلیکولو سره امریکایانو ته د ملکي افغانانو د وژلو قانوني جواز ورکړ !!
نو! زموږ مسؤلیت دادی چې له هرې ممکنه لارې څخه په استفادې باید د ګران هیواد د آزادۍ او استقلال لپاره مبارزه وکړو له هغه وروسته به نظام جوړو او ټاکنې به په خپلواکه او با امنه فضاء کې کوو.
نور که مو هیڅ په وس نه وي پوره دا خو کولی شو چې په دې جعلي ، مکاره او اشغال اوږدوونکې پروسه کې برخه وانه خلو ځکه که موږ ور نه شو همدا پروسه خود به خوده له ناکامۍ سره مخ ده.
په اخیر کې زړه له درده دا یادونه کوم چې په نړۍ کې ژر تیر ایستونکی قوم افغانان دي چې بیخي په اسانۍ سره د یو چا تر تاثیر لاندې راځي!!!
یا ربنا ته مسلمانانو ته له دي حالت څخه نجات ورکړې !!!
