ولسمشریزو ټاکنو ته وخت رانږدې شوی او د راتلونکو ولسمشریزو ټاکنو ته احتمالي نوماندانو سر له اوسه کمپاینونه پیل کړي دي. د ملي امنیت شورا پخواني مشر حنیف اتمر اوس امریکايي بمبار غندي، خو همدغه اتمر څلور کاله وړاندې له امریکا سره امنیتي تړون په پټو سترگو لاسلیک کړ. د حکومت په څلور کلنه دوره کې یې د امریکا ټول جنایتونه وزغمل، خو اوس د امریکايي بمبار مخالف شوی دی او وخت ناوخت یې غندي.
ولسمشریزو ټاکنو ته د نورو نوماندانو سربېره د اوسني گډ حکومت مشر اشرف غني هم نوماند دی. غني تېره اوونۍ وویل، چې غواړي راتلونکو ولسمشریزو ټاکنو ته بیا نوماند شي او خپل پاتې کارونه په راتلونکو پنځو کلونو کې ترسره کړي. زه حیران یم چې غني کوم کارونه نیمگړي پرېښودل، چې بیا نوماند کېږي او خپل پاتې شوي کارونه به ترسره کوي؟
په افغان واکمنانو کې ډېر کمزوري اشخاص او کمزوري حکومتونه تېر شوي، خو له ۱۳۹۳ ـ نه تر ۱۳۹۷ پورې دغه دوره بېخي خرابه وه. حکومت د مرگ اخیري حد ته رسېدلی او افغانانو په خپل ژوند کې داسې ناکام حکومت تجربه کړی نه و. غني د خپلو ټاکنیزو شعارونو ټولې ژمنې هېرې کړې او له عبدالله عبدالله سره یې د گډ حکومت بنسټ کېښود.
غني د واک وږی و، خو واکمني یې داسې خرابه ده چې نه یې ارمان ووت او نه یې ولسمشري د ولسمشر په توگه وه. د بلخ له والي سره یې یو کال چنې ووهلې او یو والي د ټول نظام پرضد غږ پورته کاوه، ولسمشر ته یې کنځلې کولې، په خپل ژمنو کې یې دروغجن باله، گواښونه یې کول او د ارگ د نیولو ښکاره خبرداري یې ورکول، خو غني د مصلحت په خاطر هر څه زغمل. عطاء محمد نور د یوې غټې معاملې پر بنسټ له واکه گوښه شو، خو د غني زور تر اخېره پرې ونه رسېده.
د غني واکمني هم داسې وه، چې هر ولایت ته یې بېلابېل شعارونه وړل. ځینې ولایتونه یې لومړۍ درجې ته پورته کړل، خو د خلکو ژوند کې هېڅ بدلون رانه غی، بلکې هر څه یې سرچپه ختل. ولایتونو ته د غني سفرونه هم د ټاکنیزو کمپاینونو یوه برخه ده او غواړي خلک بیا تېرباسي او بیا غوړې ژمنې ورکړي.
که غني بیا واکمن شو؟
که سوله وشوه او طالبان راغلل، نو د غني د راتلونکو پنځو کلونو خوبونه یوازې خوبونه پاتې کېږي. غني به محکمې ته وړاندې کېږي او د خپلو کړیو جنایتونو ځواب به وايي. د غني د واکمنۍ په موده کې په زرهاوو زره افغانان وژل شوي. د واکمنۍ دایره یې یوازې تر ښارونو پاتې شوه او طالبان وتوانېدل چې ۷۲سلنه خاوره تر خپل حاکمیت لاندې راولي. غني له امریکا سره امنیتي تړون لاسلیک کړ او د امریکا د هر جنایت پر وړاندې غلی پاتې شو. ده دومره هم ونه کړای شول، چې دغه بریدونه وغندي او له خپلو خلکو سره د خواخوږۍ تمثیل وکړي.
که غني بیا واک ته راځي، نو دا ځل به د گډ حکومت پر ځای پر یوه داسې حکومت هوکړې ته رسېږي، چې بیا به په ټوله نړۍ کې بې جوړې حکومت وي. کېدای شي دا ځل د اجراییه ریاست سربېره پکې نوی ریاست هم ځای کړي. عمر داودزی، عطاء محمد نور، حضرت عمر زاخېلوال، عبدالله عبدالله او حنیف اتمر به ټول حکومت کې وي. یو به ولسمشر بل به اجراییه رییس، بل به لومړی وزیر او یو بل ته به بل ځای پیداکړي. ځکه غني په معامله کولو کې تکړه او بې جوړې انسان دی او دا ځل به حتما همداسې یو اچاري حکومت جوړوي.
د غني د واکمنۍ مړي، ټپیان، بمبار، داعش، کډوالي، تش شعارونه او له اسلام سره ناخبري لا د خلکو له ذهنونو وتلي نه دي او نه به بیا د حکومت د واک پر گدۍ کېني.
