خوست امنيتي مسوولين: یعقوبيو کې د ملي اردو لس عسکر وژل شوي دي
(کابل ټکی کام، ۱۳۹۷، لیندۍ ۱۹)
د خوست امنیتي مسوولين وايي، طالبانو تيره شپه د یعقوبيو او صبريو ولسوالۍ مربوط په خلبيسات سيمه کې د امنيتي ځواکونو پر پوسته بريد کړی او عسکرو ته يې مرګ ژوبله اړولې ده.
د خوست د امنيت امر سيد احمد بابزی وايي، د طالبانو په بريد کې د ملي اردو لس سرتيري وژل شوي او يو تن طالبانو ژوندی نيولی دی.
خو ځايي اوسېدونکي وايي، په سيمه کې د وژل شويو عسکرو شمير تر هغې زيات دی چې امنيتي مسوولين يې مني.
له بله پلوه طالب وياند ذبيح الله مجاهد وايي، په ياده سيمه کې د “دښمن دوه مهمې پوستې فتحه شوي” زياتوي د جګړې په ترڅ کې پنځلس عسکر وژل شوي، ګڼ شمير نور ټپيان دي او يو تن طالبانو ژوندی نيولی دی.
طالب وياند په خپله رسمي ټويټر پاڼه د نيول شوي عسکر او په ياده نښته کې د نيول شويو درنو او سپکو وسلو انځورونه هم خپاره کړي چې په وينا يې تيره شپه د طالبانو لاسته ورغلي دي.
نوموړی زياتوي په دغه جګړه کې طالبانو ته زيان نه دی رسېدلی.
