طالبان: زمونږ کوم مشر د انټرپول له خوا نه دی نیول شوی

(کابل ټکی کام ۱۳۹۷ لیندۍ ۲۰)

تیر ورځ ناوخته د کورنیو چارو وزات په یوه خبر پاڼه کې ادعا وکړه چې ګواکې د طالبانو د واکمنۍ د مالیې وزارت مرستیال ملا جلیل آخُند یې هغه مهال نیولی چې په جعلي تذکره او پاسپورت یې هڅه کوله څو د سپین بولدک له لارې پاکستان ته لاړ شي.

وزارت ویلي دې کس د ولي محمد په نامه تذکره جوړه کړې وه، چې د دوی ځیرکو مؤظفینو د بایومتریک په توسط معلومه کړه چې دغه کس د طالبانو د واکمنۍ پرمهال لوی چارواکی و، چې د ملګرو ملتونو د انټرپول پولیسو په لیست کې وار له مخه داخل وو.

طالبانو دا خبر رد کړی چې ګواکې د دوی کوم مشر دې نیول شوی وي او ویلي یې دي چې دا کس د دوی په لیکو کې شتون نه لري او څوک یې نه پیژني.
طالب ویاند قاري یوسف احمدي ویلي

“موږ دا پروپاګند په کلکه ردوو، د اسلامي امارت د مالي وزارت د ملاعبدالجلیل په نامه مرستیال نه لاره او بل خپور شوی تصویر هم هيڅوک نه پيژني، نو په دې اړه خپاره شوي راپورونه حقیقت نه لري. “

د نوموړي کورنۍ بیا وایي چې دا کس عادي بزګر و او هیڅ کومه جرمي سابقه نه لري او اوسمهال پاکستان ته د خپلې تداوۍ په موخه روان و چې ونیول شو.
دغه راز کورنۍ یې له حکومت څخه غواړي چې نوموړی باید ژر تر ژره راخوشی کړي