(کابل ټکی کام، ۱۳۹۷، لیندۍ ۲۲)
د غزني ولايت په قره باغ ولسوالۍ کې د افغان او بهرنيو ځواکونو په ګډو عملياتو کې شپږ ملکي وګړي وژل شوي دي.
د يادې ولسوالۍ اوسېدونکي وايي، چې وړمه شپه قره باغ ولسوالۍ مربوط (ولي داد کلا، کنډه لغ، چاکر او لوګر) کليو کې ګډو ځواکونو عمليات پيل کړل چې پر مهال يې د يو شمير کورونو دروازې په بمونو الوزولي او یو مسجد او يو کور يې په مکمله توګه ويجاړ کړي دي.
که څه هم دغه عمليات تيره شپه پای ته رسېدلي خو د يوه ښوونکي په شمول شپږ تنه ملکي وګړي يې لومړی له خپلو کورونو ايستلي او وروسته يې په ډزو سره وژلي دي.
د قره باغ اوسېدونکي وايي، عملياتي عسکرو يې له کورنو قيمتي مالونه او پيسې هم لوټ کړي زياتوي چې د تلو پر مهال يې درې کسان چې عام وګړي دي له ځان سره د بنديانو په توګه وړي دي.
په وروستيو کې د افغان او بهرنيو ځواکونو شپني عمليات زيات شوي چې تر ډيره پکې ملکي میشت ځايونه زيانمن کېږي او تلفات يې ملکي خلک ګالي.
