(کابل ټکی کام ۱۳۹۷ لیندۍ ۲۳)
له کونړ ولایت څخه ورکړل شوي راپورونه وایي چې د افغان او امریکایي ځواکونو په ګډو عملیاتو یو بشپړ کلی له منځه وړل شوی او لسګونه ښځو او ماشومانو ته په کې مرګ ژوبله اوښتې.
پیښه د چلتن ولسوالۍ په “چوکان“ دره کې رامنځته شوې ، د سیمې د اوسیدونکو په وینا چې په پيښه کې د څلورو کلیو ټول کورونه نړيدلي دي.
د وروستیو معلوماتواو تازه را رسیدلو جزئياتو له مخې امریکايي عسکرو لسګونه ملکي هیوادوال لومړی له کورونو څخه را ایستلي او شهیدان کړي یې دي، وروسته يې له ښځو او ماشومانو څخه په ډکو کورونو باندې پراخه بمباري کړې، په نتیجه کې ۶۵ تنه عام اولسي خلک چې اکثره په کې ښځې او ماشومان دي شهیدان شوي دي.
بلخوا بیا د کونړ ځایي چارواکي ټول ښځې او ماشومان وسلوال طالبان بولي چې په وینا یې د بهرنیو او کورنیو طالبانو ګڼ جنګیالي یې په نښه کړي دي.
د کونړ د والي ویاند غني مصمم رسنیو ته ویلي، په دغه پیښه کې د دریو عربانو ، دریو ازبکانو په ګډون تر شلو د طالب او القاعده وسلوال وژل شوي دي.
بلخوا بیا د یاد ولایت دعامې روغتیا رئیس عزیز الرحمن ساپي امریکا غږ ته ویلي چې د اسعداباد ولایتي روغتون ته تر اوسه د هیڅ وسلوال جسد نه دی وروړل شوی یواځې څوتنه ټپي ولسي کسان چې اته یې ماشومان، درې مېرمنې او څلور سړي پکې شامل دي، ووړل شوي دي.
د کونړ د امنیې قوماندان حقنواز حقیار بیا وایي چې په دې عملیاتو کې چې څلور ساعته یې دوام وکړ سخته بمباري هم تر سره شوې چې ښایي ملکیانو هم زیان لیدلی وي.
طالبانو پیښه بشرضده جنایت بللی او ویلي یې دي چې “ په دا ورستیو کې امریکايي اشغالګر او غلامان يې د خپلو پرلپسې تلفاتو او شکستونو له امله وارخطا شوي او له عامو افغانانو څخه خپل کسات اخلي“
سرچینې وایي چې په سیمه کې لوی ناورین او بوږنونکې فاجعه رامنځته شوې او اوس مهال د نورو کلیو خلک سیمې ته رسیدلي، شهیدان او ټپيان له خاورو څخه را باسي
داپیښه داسې مهال رامنځته کیږي چې بیګاه په هلمند ولایت کې هم د بې پیلوټه الوتکې په برید کې درۍ ډاکټران او یو موټروان وژل شوي و.
