مشرانو جرګه: د سولې اوازې په مرګونو پیښو بدلې شوې
(کابل ټکی کام ۱۳۹۷ لیندۍ ۲۵)
د مشرانو جرګه وایي چې د خلیلزاد د هڅو سربیره بیا هم په هیواد کې د سولې عملي نښانې نه لیدل کېږي او وضعیت ورځ تر بلې په خونړي کیدو دی.
سناتوران وایي، په هیواد کې د ملکي مرګ ژوبلې کچه په ډراماتیک ډول پورته تللې او په شپنیو چاپو او عملیاتو کې په بیسارې توګه ولسي افغانان تلف کیږي .
د دوی په وینا چې د دې عملیاتو په تړاو د دولتي چارواکو،نړیوالو بشري سازمانونو او ناټو ځواکونو چوپتیا هغه څه دي چې د ملکي مرګ ژوبلې عاملینو ته یې لا جرأت ورکړی دی.
د مشرانو جرګې د نړیوالو اړیکو کمیسیون وایي، روان وضعیت د منلو نه دی او په مخنیوي کې یې باید ښکیل لوري جدي اقدامات وکړي.
د مشرانو جرګه داسې مهال دا اندیښنه څرګندوي چې د ګډوځواکونو له خوا په همهاله توګه د هیواد په ګوټ ګوټ کې پر ولسي خلکو بیسارې بمبارۍ او شپنۍ چاپې روانې دي او هره ورځ لسګونه بیګناه هیوادوال په کې خپل ژوند له لاسه ورکوي
