د جرمني دفاع وزيره په نا اعلان کړي سفر کابل ته راغلې ده
(کابل ټکی کام، ۱۳۹۷، لیندۍ ۲۷)
د جرمني دفاع وزيره (ون ډېر لېين) تيره شپه په يوه نا اعلان کړي سفر کابل ته راغلې او دغلته يې د خپل هېواد له ځواکونو سره کتلي دي.
په کابل کې د جرمني سفير د هغې د راتګ پخلی کړی او په خپله رسمي ټويټر پاڼه ليکلي، د ناټو تر قومندې لاندې په افغانستان کې ميشت جرمني ځواکونه به دفاع وزيرې ته د جګړې د وضعيت په اړه معلومات ورکړي.
افغانستان ته د جرمني د دفاع وزيرې د دغه ناڅاپي سفر په اړه نور معلومات نه دي ورکړل شوي خو په ناټو کې د جرمني استازي په عين حال کې ويلي چې جرمني ځواکونو د سولې راتلو لپاره د افغان ځواکونو سره خپلې مرستې دوامداره ساتي.
تر اوسه معلومه نه ده چې د جرمني دفاع وزيره به له افغان چارواکو سره وګوري که نه.
جرمني د ناټو تر قوماندې لاندې په افغانستان کې ديارلس سوه ځواکونه لري چې افغان ځواکونو ته د سلا مشورو، روزنې ورکولو تر څنګ وخت ناوخت په جګړو او هوايي بريدونو کې هم برخه اخلي.
