ملګري ملتونه: ولسي جرګې ټاکنو غوندې، ولسمشرۍ ټاکنو کې ګډوډۍ د منلو نه دي
(کابل ټکی کام، ۱۳۹۷، لیندۍ ۲۷)
د افغانستان لپاره د ملګرو ملتونو ځانګړی استازی تاداميچي ياماماتو ويلي، په افغانستان د ولسي جرګې ټاکنو غوندې په ولسمشريزو ټاکنو کې ګډوډۍ ورته د منلو نه دي.
ياماماتو، دغه څرګندونې تيره شپه په نيويارک کې د افغانستان په اړه د ملګرو ملتونو د امنيت شورا په غونډه کې وکړې.
که څه هم په تيرو ولسي جرګې ټاکنو کې د امنيتي ګواښونو او په ټاکنو د خلکو د بې باورۍ له کبله ډيرو خلکو ګډن نه و کړی خو د ياماماتو په وينا بيا هم تر يوې اندازې زياتو خلکو په ټاکنو کې برخه اخيستې وه.
هغه د ټاکنو په کمېسيونونو غږ وکړ چې راتلونکو ټاکنو کې د ولسي جرګې ټاکنو په څير تيروتنې نه کوي او ټاکنې دې په ښه مديريت ترسره کړي.
د سياسي ګوندونو، نوماندانو او شنونکو په وينا، د ولسي جرګې د تيرو دوه ورځو ټاکنو کې پراخې درغلۍ شوي او ډيری نوماندانو د پيسو، فساد او رشوت ورکولو په مټ پارلمان ته لاره پيدا کړې ده.
د ټاکنو شکاياتو کمېسيون وايي، د ولسي جرګې ټاکنو په دوه ورځو کې له يوولس زره څخه زيات شکايتونه ثبت شوي دي.
