کابل.کام – د لېندۍ ۲۷مه، ۱۳۹۷:
د طالبانو ویاند ذبیح الله مجاهد په یوه تازه خپره شوې اعلامیه کې ویلي چې د متحده عربي اماراتو په ابوظبي ښار کې له امریکايي لوري سره یې په غونډه کې د اوربند، مؤقت حکومت، ټاکنو او نورو داخلي موضوعاتو په اړه هیڅ خبرې نه دي کړې، ”بلکې امریکایي اشغال د بحث محور دی. “
د طالبانو ویاند دا خبرې د رویټرز خبري اژانس د هغه وروستي راپور په غبرګون کې کړې چې ویلي یې و امریکا له طالبانو شپږ میاشتې اوربند غوښتی او طالبانو په مشروط ډول د مؤقت حکومت منلو وړاندیز قبول کړی دی.
ښاغلي مجاهد د ابو ظبي د غونډې په اړه د رویټرز اژانس راپورونه ”غلط، جعلي او استخباراتي اړخ درلودونکي“ بللي دي. ”رویټرز خبري آژانس په متحده عربي اماراتو کې د اسلامي امارت د استازو او امریکایي لوري ترمنځ د ناستې په تړاوو له پرونه راهیسې غلط او جعلي راپورونه خپروي.“
”د مجهولو سرچینو په حواله په دې تړاوو جعلي راپورونه چې د رویټرز آژانس لخوا خپریږي ټول استخباراتي اړخ لري چې باید هیڅ څوک پرې باور ونه کړي.“
د طالبانوویاند زیاته کړې چې د دې غونډې تفصیلي جزیات به وروسته له رسنیو سره شریک کړل شي.
