صفي الله رائد
داسې ملګری مې و چې جوړه یې نوه، زمونږ کیسو او خنداګانو ته به نور حوسېدل، په ملګرتیا به مو نورو غبطه کوله، تر دې چې یو له بل پرته به چا نه ليدو خو! اوس مو هغه خوند نشته، اوس مو ترمنځ هغه خوږې کیسې او خنداګانې الوتې دي.
هو! اوس مو مبایل ترمنځ دیوال ګرځېدلی.
هفته او یاهم میاشت کې یوځلې راشي، وایي: نه نه چای راته وانه چوې؛ ځکه اوس مې وچیکه، ستړی یم، روان یم، پر واټسآپ بیا ګپه کوو! اوس دې خدای په امان ..
وخت ناوخته پر مبایل پیغام پرېږدي، څنګه یې؟ چیرته یې؟ څه حال ده؟ ورک یې بیخي، نه ښکارې؟ او بس!
زه یې هم پیغام کله پر وخت ځواب کړم او کله هم ډېر ناوخته؛ ځکه مبایل مې کله چارج نه لري او کله هم راسره مبایل نه وي.
چا راته کیسه کړه چې داسې یو نېږدې ملګری مې ډېره موده پس میلمه راغلی و، تر لنډ روغبړ وروسته یې مبایل له جیب را وویست، رابطې او کیسې یې شروع کړې، زه یې پر وړاندې حیران او چپ ناست وم، خو دی هماغسې له مبایل سره بوخت و، څو وارې مې ترې د حال پوښتنه وکړه خو د زړه لپاسه به ېې په څو لنډو ټکو ځواب راکړ.
وایي: مخکې به چې کورته میلمه راغی نو لومړی به یې د مسجد، قبلې، جای نماز، او د اودس لپاره د یوې لوټې اوبو پوښتنه او غوښتنه کوله، مګر اوس لومړی د چارجر، انترنېټ او ترې جي 3G او فورجي 4G پوښتنې کوي! چې ورته د جمعې لمونځ ووایې؟ وایي: تاسې خپله جمعې ته ولاړ شئ؛ زه هسې هم مسافر یم.
ځینې بیا غواړي ترڅو ملګرتیا مبایل ته وغځوې! خو ډېری بیا مبایل یواځې د رابطې لپاره یوه آله ګڼي، نه د ملګرتیا لپاره؛ ځکه که یو وارې ملګرتیا تر مبایل محدوده شي نو بیا خو د هر چا ملګري پر مبایل، فسبوک او واټسآپ له لسو زرو هم اوړي، هو! همداسې ده؛ ځکه دا ټول سړي سره رابطه او په فارغ وخت کې یو سلام کلام لیږي رالیږي او په فارغ وخت کې یې مقابل لوری ځوابوي!
نو ایا دا دې ټول په ملګرتیا کې یاد او حساب شي؟؟
او یاهم دېته د ملګرتیا نوم ورکول مناسب دي؟
نه هېڅکله هم نه!؛ ځکه دا په اصل کې شناخت او رابطه ده، نه ملګرتیا!
که یوار ملګرتیا تر فسبوک او واتسپ محدوده شي نو بیا خو که انټرنټ نه وي او یاهم بند شي نو ته وا ملګري او ملګرتیا سره به څه کېږي؟!
زه وایم دا هسې شناخت او شناخته دوستانو سره د رابطې یوه اسانه لاره او وسیله ده او بس!
ملګرتیا دېته نه وایي: چې کله فارغ وې نو یو پیغام پرېږده!
او که فارغ نه وې نو بس خپل کارکوه!
داخو نو داسې یو مثال لري لکه د مبایل ګېم، چې خُلک ( طبیعت) دې خراب وو نو رازه لږ ګېم وکړه او یا هم چې بې کاره وې نو رازه ګېم وکړه ګنې نور خپل کار کوه!
هو! ډېری همداسې کوي!
یو ملګری د مبایل له ګېم سره برابروي! چې د اړتیا په صورت کې یې کاروي ( یعني هسې ساتېری) او بس!
زما په اند ملګرتیا نه باید تر مبایل محدوده شي او نه هم له یو نېږدې ملګري او دوست سره راشه درشه او ناسته ولاړه د مبایل تر پیغامه را ښکته شي!
ځکه پر مبایل ملګرتیا پالل ملګرتیا غځوي نه، بلکې ملګررتیا غوڅوي!
هو! چاسره چې رښتینې ملګرتیا لرې نو هغه سره بیا ملګرتیا پر مبایل یواځې مه کوه، بلکې پر مبایل ورسره رابطه کوه!
ځکه رابطه او شناخت بېل وي او ملګرتیا بیله!
