د تېر دسمبر په مياشت کې چې په اسلام اباد کې د اسيا زړه په نامه کنفرانس جوړ شوی و او پکې تر ۳۰ پورې ګاونډيو او د سېمې هېوادونو برخه اخيستې وه ، دامريکا ، چين او روسيې ونډه پکې زياته وه. په کنفرانس کې د سېمې د هېوادونو ترمنځ د اقتصادي ، سياسي او نورو برخو کې دهمکاريو څخه لومړيتوب د افغانستان مسئلې ته ورکړل شوی و.
دغونډې کوربه هېواد ياد کنفرانس ته د سېمې هېوادونه په دې موخه رابللي ول، چې نور د افغانستان مسئلې ته د پای ټکی کېږيدي . امريکا ، چين ، پاکستان په خپلو کې ژمنې وکړې ، چې د طالبانو سره به د مذاکراتو د پېل څخه د مخه خپلو کې لومړی لېدنه وکړو، چې په همدې موخه کابل ته د پاکستان لوی درستيز راحيل شريف راغی او د اشرف غني او د ډاکټر عبدالله په شمول يې د هېواد د لوړ پوړو چارواکو سره هم وليدل . په دې ليدنو کې د مذاکراتو نيټه څرګنده نشوه؛ خو دومره وويل شول چې د نوي کال ۲۰۱۶ ز په جنورۍ کې به مذاکرات وشي و چې دا دی د نوي کال په رارسيدو سولې او مذاکراتو ته د افغانانو هيلې زياتې شوي دي. د بلې خوا چې ډاکټر عبدالله او ولسمشر اشرف غني له پاکستانه کومې نارضايتۍ درلودې کابل ته د پاکستان د پوځ د سرلښکر راحیل شريف په راتلو هغه هم لري شوي او د طالبانو سره د مذاکراتو او سولې امن هيلي يې بيا څرګندې کړې. تېره ورځ چې د پاکستان د دفاع وزير خوا جه اصف په اسلام اباد کې خبري غونډې ته وينا کوله يوې خطرناکې موضوع ته يې اشاره وکړه ، چې د مخه به کابل پر اسلام اباد نيوکې کولې ، چې د افغان مسئلې د حل په اړه د صداقت ګامونه پورته کوي . د سولې د مذاراتو د ناکامي به يې په اسلام اباد ور اچوله ؛ خو د اسلام اباد اسيا زړه په کنفرانس کې پرېکړه شوې چې دا ځل به امريکا ، چين ، پاکستان او افغانستان په شريکه د مذاکراتو د پېل کولو هڅې کوي. خواجه اصف وويل: البته د تېرو مذاکراتو په پرتله د نوو مذاکراتو د پېلولو لپاره پاکستان هڅه کوي، چې ټول طالبان مذاکراتوته رضا کړي او که کوم طالبان سوله نه غواړي د هغوی پرخلاف به مبارزه کوي.
دلته د خواجه اصف اشاره ديته وه ، چې د اسلام اباد له سرڅخه به د مذاکراتو د ناکامۍ پړه پرېوزي، چې دا ځل خپله افغانستان هم د مراکراتو په پېل کولو کې شريک دی . د کارپوهانو په نظر، که خدای مکړه ، د طالبانو او دولت مذاکرات ناکام شي ؛ نو په افغانستان کې به يوه بله نوې جګړه پېل شي . لومړی به دولتي پوځونه يوازې د طالبانو په مقابل کې جنګيدل اوس به د نوې راپيداشوې داعش ډلې سره هم جنګېږي . ورسره به په ولاياتو کې د طالبانو او داعش ترمنځ هم جګړه زور واخلي. لومړی د روسانو په مقابل کې د امريکا د وسلو جوړولو کارخانې مجاهدينو سره د بين المللي مرستو په مقابل کې چليدې ، بيا د۲۰۰۱ راپدېخوا دولت ته يې د طالبانو په مقابل کې د ملياردونو ډالرو سپکې او درنې وسلې ورکړې ؛ که مذاکرات نکام شي د داعش ډله به د امريکا د پراخو وسلو او ډالرو په زور بې روزګاره ځوانان جلب کوي، د دولت او طالبانو په مقابل کې به جګړه روانه وي . همدا اندېښنه وه ، چې د افغانانو خوب يې حرام کړی دی.
