(کابل ټکی کام، ۱۳۹۷، لیندۍ ۲۹)
طالب وياند ذبيح الله مجاهد په خپله رسمي ټويټر پاڼه ليکي: نن په ځینو ځایونو آوازې خپرې شوې دي چې انس حقاني له زندان څخه راخلاص شوی دی. دغه آوازې حقیقت نه لري، تر اوسه پورې د نوموړي د خلاصون په اړه اسلامي امارت ته اطمئنان نه دی ورکړل شوی او نه هم په دې برخه کې کوم د پام وړ پرمختګ شوی.
انس حقاني د ۲۰۱۴ميلادي کال په اکتوبر مياشت کې د ګوانتنامو زندان د راخلاص شويو طالب زندانيانو ليدلو لپاره قطر ته تللی و چې د بيرته راګرځېدو پر مهال د امریکايي استخباراتو له خوا ونيول شو، خو د ملي امنيت ادارې ادعا وکړه چې نوموړ يې په خوست کې د عملياتو په ترڅ کې نيولی دی.
تر اوسه امریکا يا افغان حکومت د انس حقاني کوم جرم نه دی روښانه کړی خو له تيرو څلورو کلونو راهيسې یوازې له دې کبله په زندان کې ساتلی چې نوموړی د طالبانو د مرستيال سراج الدين حقاني ورور دی.
