امريکا: د سپينې ماڼۍ او سنا تر منځ اختلافاتو له کبله ګڼ شمير دولتي ادارې تړل شوي
(کابل ټکی کام، ۱۳۹۷، مرغومې ۱)
د سپينې ماڼۍ او سنا مجلس تر منځ د مکسيکو پر پوله د ديوال جوړولو پر سر د اختلافاتو له کبله په امريکا کې ګڼ شمير دولتي ادارې تړل شوي دي.
په سنا مجلس کې ديموکراتان او جمهوري غوښتونکي د ولسمشر ټرمپ له خوا غوښتل شوې بوديجې پر سر هوکړې ته نه دي رسېدلي چې له کبله يې د امريکا د وزارتونو، د فدرال دولت بسنټونو د کورجوړونې، د کورني امنيت، د کرنې، بهرنيو چارو وزارتونو او ګڼ شمير نورې ادارې تړل شوي چې د ځايي سرچينو په وينا له کبله يې شاوخوا اته زره دولتي مامورين بې کاره شوي دي.
ډونالډ ټرمپ غواړي د امريکا او مکسيکو تر منځ د کډوالو د مخنيوي لپاره ديوال جوړ کړي چې له پنځو تر اويا ميليارده ډالره مصرف پرې راځي خو ديموکراتان وايي دا هسې د بوديجې ضايع کول دي، ځکه يې په سنا کې رايه ورنکړه.
امريکايي رسنۍ وايي، نن د شنبې په سهار ګڼې دولتي ادارې تړل شوي او د متحده ايالاتو ولسمر ټرمپ ويلي چې ښايي د فدرالي حکومت ادارې تر اوږدې مودې لپاره تړلې پاتې شي چې مسووليت به يې د ديموکراتانو پر غاړه وي.
که څه هم د امريکا په ولسي جرګه کې تيره ورځ د ټرمپ د بوديجې طرحې ته ۲۱۷ مثبت او ۱۸۵ منفي رايې ورکړل شوې خو د سنا د تګلارې له مخې یاده طرحه بايد په سنا کې هم له سلو څخه شپيته رايې واخلي په داسې حال کې چې جمهوري غوښتونکي په سنا کې يوازې يوپنځوس سيټونه لري.
