نعمان لطیف
دکابل اداره کې دملي امنیت مشاور حمدالله محب چې له ابوظبي شرمنده، خجل او دلګیر وطن ته راوګرځېد، کابل کې یې وویل: سوله راروانه ده لخیره
محب هېوادوالو ته داسې وښودله چې ګواکې دی له ټول جریان خبر دی، یا چې خلیل زاد د دوی نمائنده وي، له طالبانو سره ئې مذاکراتو ته پرېښودی وي، برنامه ئې ورکړي وي او دی په خپله هېواد ته ترې را وګرځېد.
ډاکټر غني توقع درلوده چې که چېرې د رسمي ناستې چانس ترلاسه نشي، ممکن بېرون له غونډې په غیر رسمي ډول دطالب پلاوي کوم غړي سره دملاقات فرصت ومومي
په دې توګه به ځان له خېل خندۍ خلاص او خپل لړزېدلی او اعتماد بایللی حیثیت تر یوه حده وساتلی شي، مګر طالبانو چانس ورنکړ، خپه او دلګیر ئې کابل ته را ستانه کړه
تر غونډې وروسته دحمدالله محب ژبه بدله شوه او له خپل ټوېټر ئې داسې ټوېټونه وکړه چې ماشوم هم پرې وپوهېد چې سړی سخت وارخطا او مایوس دی، ان دخپل نظام په بقاء شکمن دی
دحمدالله محب تر ټولو ماشومانه جمله اخطاریه هغه وه چې دهېواد دارضي تمامیت، حکومتي چارو کې دمداخلت او استقلالیت په اړه ئې لیکلې وه، مګر بېچاره محب دې ته فکر نه کوي چې داسې خبرې دده د ماشومانه فکر ښکارندویي کوي چې خلک به لا زیات پسې وخندوي.
حمدالله دکوم نظام او کومې خپلواکۍ خبرې کوي؟!
هغه نظام چې جان کیري نصب کړ، ددوستم په څېر فاعل، مفعول، له تمامو اصولو او ارزښتونو ناخبره ئې لومړی مرستیال دی، تر وزیر او وکیل ورته افراد له بهرنیو سفارتونو ټاکل کیږي او په هر لوړ پوست ئې دکابل سرای شهزاده کې بولیانې وهل کیږي؟
کومه خپلواکي؟!
هره شپه ولس بمباریږي، هره شېبه بمونو وریږي، په کراتو اردو بمبار شوه، کونړ لکه لا وارثه ماشوم دمیزایلو تر باران لاندې دی، یوه مستعفي وزیر وویل ډېورنډلاین په دوبۍ کې په اویا میلیونه وپلورل شو
پوځیان مو له امریکایي راشن علاوه یوه ورځ سر او سنګر نشي ساتلی، الوتکې مو د امریکایانو له اجازې پرته نشي پورته کیدلای او تر ټولو عجیبه داده چې امریکایۍ خلیلزاد لګیا دی د افغانستان پر سر له افغان طالبانو سره دجوړ جاړي خبرې کوي
ستاسو ځای تالار کې نشته دی او حتی له ابوظبي شړلای کیږئ. تر دې پورته بلواکه نظام او چارواکي تاریخ لیدلې ده؟
تاریخ مو ګام پر ګام څاري، دخدای په لحاظ داسې تاریخي سپین سترګي درته تلپاته پیغور ګرځي، که تاسو شرم نه لرئ نسلونه به مو تر دغو پیغورونو لاندې سرټیتي وي.
کیسه ده چې کومه یږه سېلاب کې ګیره شوې وه، څومره به چې اوبه پورته ورختلې، دی به هومره بچی ترې پورته کاوه، تر دې چې بچی یې پر سر بالا کېښود، کله چې اوبه د’یږې’ تر مرۍ رسېدلې دي په دې فکر چې ګویا ځان به وژغوري بچی یې تر پښو لاندې کړی دی.
امریکایانو دلته ډېر خلک سر ته وخېژول؛ هغوی مطلب ترې درلود او تر ډېره ئې له ځانه ددفاع پخاطر پورته کول او ژغورل، اما اوس چې امریکایان خپله په غرقېدا ده نو مجبوره ده ساتلي نازولي تر پښو لاندې کړي
محب او انډېوالان ئې د امریکایي ښکیلاک ساتلي نازولي دي، دا چې اوس ئې تر پښو لاندې کوي دا د استعمار زوړ دستور دی
د استعمار چوپړیان چې نن دلګیر او خپه دي، دوی ته پکار وه مخکې تر دندې ئې دښکېلاک تاریخ دقیق لوستی وای، اوس ورته دغرناطې د وروستي پاچا عبدالله په څېر د پښېمانۍ تر اوښکو هاخوا بل هیڅ امتیاز نشته دی.
