(کابل ټکی کام ۱۳۹۷ مرغومی ۲)
تر ولسي جرګې وروسته اوس د مشرانو جرګې هم له افغانستان څخه د امریکایي ځواکونو پر احتمالي وتلو اندیښنه څرګنده کړې او دا یې خطرناک اقدام بللی.
مشرانو جرګه وایي، که امریکایان رښتیا هم داسې اراده لري نو دا له شوي امنیتي تړون څخه څرګنده سرغړونه ده.
د یادې جرګې رئیس فضل هادي مسلمیار وایي، د تړون له مخې کله چې امریکایان له هیواده وځي، وار له مخه باید د افغانستان کابینه په جریان کې واچوي خو که امریکا پر خپل سر دا تکل کړی وي، پریکړه یې عجولانه بڼه لري چې ښایي خطرناکه ثابته شي.
نوموړي پر امریکا ژغ وکړ چې باید له هر اړخیزې ارزونې وروسته دځواکونو ایستلو پریکړه وکړي او له افغان حکومت سره له شوي امنیتي تړون سره دې “بې وفایي“ نه کوي.
له امریکا سره د شوي امنیتي تړون تر مخه، هر لوری چې د یاد تړون نقض غواړي باید له وړاندې خپل مقابل لوري ته خبر ورکړي څو د عواقبو اړوند یې پالیسي جوړه کړي.
تر دې وړاندې ولسي جرګې هم د امریکا پر دغه پریکړه اندیښنه ښکاره کړې وه او له امریکایي چارواکو یې غوښتي و، چې افغان متحدین دې پر نیمه لار نه پریږدي.
باید وویل شي چې امریکایي رسنیو څو ورځې وړاندې راپورونه ورکړل چې ګواکې ټرمپ غواړي له افغانستان څخه خپل نیمایي سرتیري وباسي، چې دې پریکړې د امریکا په کانګرس، د ناټو غړو هیوادونو او د افغان حکومت په چارواکو کې غبرګونونه راوپارول او له امریکا یې د زغم او پر دې تصمیم د بیا کتنې غوښتنه وکړه.
د امریکا حکومت رسماً د دې خبرونو په تړاو تر اوسه څه نه دي ویلي.
