جوزجان چارواکي: دوو پوليسو خپل ملګري وژلي، طالبانو سره يوځای شوي
(کابل ټکی کام، ۱۳۹۷، مرغومی ۴)
د جوزجان د امنيې قوماندانۍ د امنيت امر کمال الدين یاور وايي، د فيض اباد ولسوالۍ په مربوطاتو کې دوو تنو پوليسو خپل ملګري وژلي او له وسلو سره طالبانو ته ورغلي دي.
د ياور په وينا، پيښه د دوشنبې په سهار د يادې ولسوالۍ اړوند د شبرغان- مزارشريف د لويې لارې په سر په پوسته کې رامنځته شوې ده.
نوموړی وايي، بريدګرو پوليسو له ځان سره يو هاموي ټانګ، د پوستې ټولې وسلې او مهمات له ځان سره وړي او طالبانو ته ورغلي دي.
یاور وايي، د لويې لارې پر سر د عامه نظم په دغه پوسته کې پنځه تنه سرتيرو دنده مخته وړله.
هغه وايي، له پيښې وروسته د پوستې اشپز ژوندی تښتېدلی دی.
تر دې مخکې هم د افغان پوځ په ليکو کې د طالبانو نفوذي کسانو ورته ډول بريدونه کړي او د طالبانو ليکو ته ورغلي دي.
تر اوسه طالبانو په دې اړه څه نه دي ويلي.
خو طالبانو په خپلو اعلاميو کې ويلي، چې د افغان پوځ په ليکو کې يې لسګونه نفوذي کسان ځای پرځای کړي چې له موقع په استفادې به په افغان او بهرنيو ځواکونو وسله وال بريدونه کوي.
