(کابل ټکی کام، ۱۳۹۷، مرغومی ۴)
د امریکايي ځواکونو لوی درستيز جنرال جوزف ډانفورډ وايي، په افغاسنتان کې پوځي ماموريت لکه څرنګه چې پلان شوی هماغسې به دوام پيدا کړي.
ډانفورډ دغه څرګندونې تيره ورځ کابل ته نږدې په يوه پوځي اډه کې امريکايي عسکرو ته د رخصتۍ لمانځلو پر مهال وکړې.
ډانفورډ په خپله وينا کې امريکايي عسکرو ته وويل، بيلابيل ډول اوازې خپريږي خو لکه څرنګه چې تاسې پرون ماموريت درلود هماغه ډول به يې نن هم ترسره کوئ: “تاسې امريکايي سرتيري يئ، تاسې ماموريت لرئ او خپل ماموريت دوامداره وساتئ”.
څو ورځې مخې داسې راپورونه خپاره شول چې ګنې د امريکا ولسمشر ډونالډ ټرمپ پوځي چارواکو ته امر کړی څو له افغانستانه د اووه زره امريکايي عسکرو د ايستلو لپاره پلان ترتيب کړي.
خو له هغې وروسته په افغانستان کې د ناټو ځواکونو عمومي قومندان جنرال سکاټ مېلر وويل، چې تر اوسه يې د سرتيرو د ايستلو په تړاو کوم امر نه دی ترلاسه کړی.
دغه راز د سټار انډ سټرايپز خپرونې د ډانفورډ د پرونۍ وينا له مخې ليکلي، چې نوموړي وويل که افغانستان کې کوم بدلون راځي نو لومړی به پرې د ڼاټو عمومي قومندان جنرال مېلر خبريږي چې په دغه هېواد کې څه پيښېږي.
که څه هم تر اوسه له افغانستانه د امريکايي ځواکونو د ايستلو په اړه په رسمي توګه دفاع وزارت، يا په افغانستان کې ميشت امریکايي ځواکونو څه نه دي ويلي خو د امريکا شريکان او پوځي شنونکي لا هم په دې اړه تبصرې کوي چې تيره ورځ له غرب څخه خپرېدونکې (ازادي راډيو) سره په يوه مرکه کې د بحران نړيوالې ډلې یوه سلاکار او د افغانستان د چارو څېړونکي ګرايم سمېټ وويل، له افغانستانه د امریکایي ځواکونو وتل به د جګړې په ډګر کې د پام وړ بدلون ځکه رانولي چې په وينا يې، واشنګټن به د دغه شمېر ځواکونو ځای امنیتي قراردادیانو ته ورکړي.
د راپورونو له مخې پنټاګون دا مهال په افغانستان کې له ۲۵ زره ډېر د خصوصي امنیتي کمپنیو قراردادیان لري.
