لیکوال : محمد الفاتح
تاسو فکر وکړئ څوک چې د افغانستان په ډول په یوه اسلامي ټولنه کې د اسلام په څیر حق او ښکلی دین پریږدي او د مارکس او لینین نظریات خپلوي ، له فکري او اخلاقي پلوه به د داسې یو چا شخصیت څومره پست وي؟
آيا د کومې ښېګڼې او معقولیت تمه به ترې وي؟
کله چې د ظاهر خان په دوره کې د کابل په کارته چار کې د نورمحمد تره کي په کور کې ، د ملحد خلق ډيموکراتیک ګوند اساس کيښودل شو ، له هماغې ورځې پدې ګوند کې د قدرت په سر اختلافات هم پیل شول ، کله به دغو اختلافاتو سمتي او لساني بڼه درلودله.
کله چې داود خان چې له کمونیزم څخه اغیزمن ؤ او د کمونستانو په زمینه برابرونه په ظاهر خان باندې پخپله سپينه کودتا کې بریالی شو ، کرار کرار يې له شورویانو او کمونستانو څخه فاصله ونیوله. ده دا نه غوښتل چې یو مخ کمونستي انقلاب راولي؛بلکه له ډول ډول افکارو یو مخلوط نظام يې غوښت؛ ځکه شورویان چې ګرمو اوبو او فارس خلیج ته يې عاجله وه وخت يې ور نکړ ؛ په داود خان يې د (۱۳۵۷)د ثور په اوومه کودتا ترسره کړه.
دا کودتا د پوځ په دستګاه کې د (KGB) له لوري د ځای پر ځای شوو افسرانو له لوري ترسره شوه ، دا هغه افسران ؤ چې د برسونو له لارې يې په روسیه کې تحصیل ترسره کړی ؤ ، نور محمد تره کی واک ته ورسید ، دی د ګوند رئیس او دخلقي جناح اړونده کس ؤ ، یو ساده سړی ؤ ، یو سمبول ؤ اصل واک د تره کي د چالاکه شاګرد حفیظ الله امین منګولو ته ورغی.
کله چې حفیظ الله امین ښه ځان پوخ کړ ، له یو لړ پټو مقابلو او توطیو وروسته يې چې پخپله هم د څو سوء قصدونو څخه بچ پاتې شو د تره کي په خوله يې بالښت کېښود ، وې واژه او پخپله يې ځان د ګوند منشي، د انقلابي شوری رئیس او دخلق د ډيموکراتیک حکومت رئیس اعلان کړ.
د تره کي له مهاله ، بیا د امین د دورې تر پایه په نږدې شل میاشتنۍ موده کې افغانستان د انسانانو په یوه قصاب خانه بدل شوی ؤ.
اسدالله سروري چې همدا اوس د شش درک په سیمه کې د ملي امنیت په (۴۰) ریاست کې په مصؤنه توګه ورځې شپې تیروي او ساتل کیږي ، له دولس زره څخه زیات افغانان چې وروسته يې حفیظ امین لیستونه خپاره کړل په شهادت ورسول او په هرات کې يې د (۱۳۵۷) هـ ش کال د حوت له ۲۴-۲۷ نېتې پورې قابو څلورویشت زره د کمونیزم په خلاف پاڅون کوونکي په ډله ييزه توګه په شهادت ورسول.
د مورخینو په اتفاق د حفیظ الله امین په دور کې سلګونه د مقاومت جبهې را منځ ته شوې وې او کرار کرار سقوط ته نږدې کیده . امین هم په روسانو اعتماد بایللی ؤ او روسانو هم په ده اعتماد نه درلود او روسان له دې هم خبر شوي ؤ چې امین د امریکا او پاکستان لمن نیولې ، په ایران کې د امریکايي کمانډویانو موضوع توده وه ، روسان دې ویرې اخیستي ؤ چې امریکا په ایران حمله کوي ؛ ځکه نو روسان له ډيرې ور خطايي په ډيره عجله په افغانستان د (جدې ) په شپږمه راوختل له اتیا زره څخه زیات عسکر يې افغانستان ته را دننه کړل .
هغه مهال هم د نن پڅير اردو شتون درلود چې افسران يې پردیو روزلي وه. یو ډز يې هم په روسانو ونه کړ ، دومره بې غیرته اردو وه چې له داود خان څخه يې هم د څو جګړه نانو خورضابطانو او لنډه غرو کمونستانو په مقابل کې دفاع ونه شوای کړای.
روسان مخامخ د تاج بیګ ماڼۍ ته چې لا له مخه يې په کابل کې د خپل سفیر په تشویق امین ورلیږلی ؤ تر څو يې یو وخت وژنه ورته آسانه شي ولاړل او هلته يې د یوې روسۍ خدمې له لوري په ورکول شوو زهرو نیمه مسموم امین په ډيره آسانۍ وواژه او دوه زره ګادر يې هم ټول ورته قتل عام کړ.
کارمل په لینین له درود ویلو سره د تاشکند څخه د راډیو له څپو خپله واکمني اعلان کړه او د نني کرزي ، اشرف غني، ډاکټر عبدالله او حنیف اتمر په څير يې شوروي یرغلګرې لښکرې خپلې دوستې لښکرې وبللې او د افغان ـ شوروي دوستي ته يې ځان ډير ژمن وښوده او دا دوستي يې ډيره وستایله.
د جدې د شپږم له تورې ورځې څخه د افغانستان بد بختي چې د ثور له اوومې څخه پیل شوې وه توفاني شوه چې تر ننه پورې يې زموږ بې چاره هیوادوال د اور په لمبو کې سوځيږي او له دردنو او کړاوونو څخه يې ځوریږي.
شورویانو چې د همدې نننیو امریکایانو په څير يې د ازادۍ ، تمدن او پرمختګ شعارونه ورکول د ټولو افغانانو په تير ایستلو ونه توانیدل ، پر تور مخ يې درنې څپيړې پیل شوې او یو وخت داسې هم راغی چې د تيښتې د لارې د پيدا کولو زولۍ يې هر چاته غوړوله ، غرور يې پر ځمکه را پریوت او بالاخره يې وروستي عسکر د حیرتانو په بندر کې شاته راوکتل او په معنی دار انداز يې د مخه (ښې) لاس وخوځاوه.
ډاکټر نجیب چې اووه کاله يې د افغانانو قصابي وکړه او د کابل د قصاب په لقب يې شهرت وګاټه د افغاني کمونستانو د شیطاني کورګه کي د ساتنې ډيرې هلې ځلې وکړې ،له ځانه يې د سولې سپينه کوتره جوړه کړه او داسې آیاتونه يې ویل تا به ویل چې بیخي د ایران په څیر د افغانستان خمیني ده.
نن هم ډير ساده ګان نجیب ته له شهید څخه وايي ، حال دا چې نجیب له هماغه (۱۳۴۴) لمریز کال څخه چې د ملحد خلق ډیموکراتیک ګوند غړیتوب يې منلی ؤ له شهید او شهادت څخه بېزاري اعلان کړې وه او تر مرګ پورې ټوله مبارزه يې له شهید او شهادت سره وه.
بالاخره نجیب هم له واک لرې او هم څو کاله وروسته د یوې اسلامي محکمې له لوري په اعدام محکوم او د آرینا په چوک کې په دار را وځړول شو ؛ ځکه یو خو طالبان له تلویزون سره مخالف ؤ او بل کیدای شي د نجیب داسې ننداره به په تلویزون نه وه ممکنه ؛ ځکه اوس کیدای شي څوک له ځان څخه نجیب جوړ نکړي.
بیرته راځم د سر خبرې ته واقعاً که څوک د اسلامي افغاني ټولنې په څير په یوه ټولنه کې اسلام پریږدي د مارکسیسزم او لینینیزم پسې راونیږي دا به ډير پست او له اخلاقي پلوه کمزوی شخص وي ، هوا او هوس به ډير پرې غالب وي، د پيسو او چوکۍ ډيره زیاته اشتها به لري، د واقعي جهاد په ګرداب کې به را ګیر وي، په زړه به تور وي ، نه به د چا ژوند ورته ارزښت لري او نه ټولنیز انساني ارزښتونه.
راځئ را پورته شئ هغه شیطانان وشړو چې بیا يې زموږ د قصابۍ لپاره د کمونستانو پاتې شوني واک ته رسولي او رسول يې غواړي.
پای
