(کابل ټکی کام ۱۳۹۷ مرغومی ۱۰)
د امریکا ولسمشر ډونالډټرمپ پر خپل ټویټر پاڼه د امریکایي جنرالانو هغه خبرې بابیزه بللې چې ویلي یې وو، له جګړه ځپلو هیوادونو د امریکایي سرتیرو ایستل د امریکا په زیان دي.
ټرمپ ویلي،
“ ما له سوریې او نورو ځایونو څخه د ځواکونو د ایستلو ژمنه کړي وه، اوس چې مې دا کار پیل کړ، نو دروغجنه میډیا او یوشمیر هغه ناکام جنرالان چې زما د ولسمشرۍ نه مخکې يې هیڅ کار ونه شو کړای، زما له کامیابو تکتیکونو څخه سر ټکوي.“
امریکایي ولسمشر ټینګار کړی چې یواځې هغه څه کوي چې ویلی یې دي.
نوموړي پر یوبل ټویټ کې ویلي، زه یواځنی واکمن یم چې وایم “ زمونږ زړور ځواکونه باید خپل هیواد ته بیرته راولو او باید نور پردي جنګونه ونه کړو.“
ټرمپ وایی؛ ناکامه جنرالان او جعلي میډیا دا غواړي چې مونږ هلته پاتې شو او زمونږ دا خبر پیکه کوي.
ټرمپ داسې مهال دا ټویټونه کوي ، چې تازه دولتي سرچینو خبر ورکړی چې د هرات له هوایي ډګر څخه سلګونه امریکایي ځواکونه په ناڅاپي توګه ایستل شوي دي.
