نیویارک ټایمز: “د امپراتوریو د بدن پاتې شونی غړى باید نور پرېږدوو“
(کابل ټکی کام ۱۳۹۷ مرغومی ۱۲)
د امریکا نیویارک ټایمز ورځپاڼې “له افغانستان څخه د وتلو مهال” ترسرليک لاندې يوه مقاله خپره کړې چې په کې یې د دې هیواد ستونزمن ماموریت او روانو حالاتو ته کتنه کړې.
ورځپاڼې ویلي، امريکايي ځواکونه له هغو وگړو د ځان ساتنې لپاره د فولادي کانکريټي ديوالونو تر شاه مېشت دي ، چې ټاکل شوې وه د هغوى مرسته وکړي.
د مقالې لیکوال لیکي، رسنۍ په حیرانونکې توګه افغانستان ته کم پام کوي او د هغې جګړې په هکله چې امریکا په کې خپل حیثیت بایلوده، چندان پام نه کوي
ورځپاڼه زیاتوي، دومره لګښتونه که امریکا بل ځای کړي وای؛ ښایي د سیالانو سیال شوی به وو.
لیکوال زیاتوي؛ امریکا تر دې مهاله داسې شرموونکې ماتې نه وه لیدلې او د نړۍ هېڅ هېواد د افغانستان په څېر د امريکا د زوال ښه سمبول نشي کېدلى.
د ورځپاڼې په باور، په دې سربیره چې امریکا هرکال په افغانستان کې ۴۵ میلیارد ډالر لګوي، خو په زیربنایي او نورو پروژو کې د امریکا د رقیبو هیوادونو پراخه ونډه، واشنګټن ته بل شرم دی او په وینا یې “کله چې افغانستان يادېږي نو واشنگټن هغه ښار دى چې د شرم او زړه تنگوالي له امله خپلو ديوالونو تر شاه ځان پټوي“
ورځپاڼه وایي، اوس د دې وخت را رسیدلی ، چې امریکا د امپراتوریو له دغه پاتې شوني غړي نه خپل ځان راټول کړي او دغه شپږمه بې ضرورته ګوته له ځانه پرې کړي.
