د اشرف غني د ځانګړي استازي په مشرۍ پلاوی پاکستان ته سفر کوي
(کابل ټکی کام، ۱۳۹۷، مرغومی ۱۲)
ټاکل شوې چې د سيمه ایزې اجماع په چارو کې د ولسمشر غني ځانګړی استازی محمد عمر داودزی پاکستان ته سفر وکړي.
د سولې د عالي شورا د دارالانشاء مشر او د ولسمشر ځانګړي استازي عمر داودزي نن په کابل کې يوې خبري غونډې ته وويل، چې راتلونکی ۲۰۱۹ ميلادي کال به د سولې کال وي خو زياته يې کړه حکومت د سولې په معاهده کې په درې مسئلو شک لري.
له افغانستان څخه د سیمې هېوادونو غوښتنه، له حکومت څخه د طالبانو غوښتنه او اهداف او هغه بیه چې د سولې لپاره باید ورکړل شي، هغه څه دي چې د «سولې معاهدې» د شکونو په توګه ترينه یادونه کيدلی شي.
دغه راز نوموړي د سولې د ټينګښت لپار د سيمه ييزې اجماع رامنځته کول مهم وبلل په وينا يې خليلزاد ځينې اقدامات کړي خو هغه د امريکا د ګټو استازيتوب کوي نه د افغانستان.
داودزي په دغه غونډه کې وويل، د سيمه ايزې اجماع رامنځته کېدو په موخه راتلونکې اوونۍ ګاونډي هېواد پاکستان ته سفر کوي په وينا يې وروسته به نورو سيمه ایزو هېوادونو ته د سفرونو په اړه تصمیم نيول کېږي.
دا په داسې حال کې ده، چې طالبانو په وار وار له افغان حکومت سره مذاکرات رد کړي او د افغان ستونزې یوازينی حل يې د امريکايانو سره خبرې او له هېواد څخه د بهرنيو ځواکونو وتل یاد کړي دي.
تر دې مخکې د افغانستان سولې په اړه د امريکا د بهرنيو چارو وزارت ځانګړي استازي درې ځلې له طالبانو سره د افغانستان شخړې په هواري خبري کړي چې دواړو لوريو دغه خبرې مثبتې بللي او ټاکل شوې راتلونکې او وروستۍ ناسته په سعودي عربستان کې ترسره کړي.
