(کابل ټکی کام، ۱۳۹۷، مرغومی ۱۳)
د افغانستان د ټاکنو د خپلواک کمېسیون مرستيال وياند ذبیح الله سادات نن د پنج شنبې په ورځ د ولسمشرۍ انتخاباتو لپاره د کانديدانو د نوم ليکنې د پيلېدو خبر ورکړ.
د سادات په وينا، نن د مرغوي په ديارلسمه نيټه دغه پروسه پيل شوه چې تردې دمه ۷۳ کسانو له کمېسيون څخه د کانديدانو معلوماتي کڅوړې ترلاسه کړي خو تر اوسه چا نوم لیکنه نه ده کړې.
نوموړی وايي، د جمهوري رياست لپاره د کانديدانو د نوم ليکنې دغه پروسه به د مرغومي مياشتې تر اخره پورې دوام وکړي.
د ۱۳۹۸کال د حمل ۳۱ د ولسمشرۍ انتخاباتو نيټه ټاکل شوې وه خو د ټاکنو کمېسيون وايي، د تخنیکي ستونزو او یو لړ نورو مشکلاتو له امله يې د دغه انتخاباتو نيټه درې مياشتې وځنډوله چې د راتلونکي کال د چنګاښ په نهه ويشتمه به ترسره کېږي.
که څه هم څو ورځې مخکې ملګرو ملتونو، د امريکا سفارت په ټاکنو کمېسيونونو کې د اصلاحاتو غوښتنه وکړه او په عين حال کې سياستوال، سياسي ګوندونه او ولسمشرۍ لپاره ځينې احتمالي کانديدان نيوکه کوي چې د ولسمشرۍ ټاکنو ځنډول د اساسي قانون سره په ټکر کې دي او دغه کړنه به پر ټاکنو د خلکو بې باوري لا زياته کړي.
