(کابل ټکی کام ۱۳۹۷ مرغومی ۱۳)
راپورونه وایي چې د میدان وردګو په سیدآباد او د هرات په شینډنډ ولسوالیو کې افغان او امریکایي ځواکونو څلور تنه افغان ولسي وګړي په نښه کړي دي.
د خبرونو تر مخه، تیرہ شپه د ملي امنیت د صفر یک قطعې وسلوالو د میدان وردګو د سیداباد ولسوالۍ اړوند د تنګي درې سیمه کې پر ولسي میشت ځایونو چاپه وهلې.
چاپه د تنګي درې اړوند په علم خیلو، ملاخیلو اوزمبورک کلیو باندې وهل شوې چې په کې د صفریک قطعې عسکرو ۲ کلیوال په مخامخ ډزو شهیدان او ۶ تنه نور یې له ځان سره بیولي دي.
دغه راز یې د ګڼو اولسي کورونو دروازې په بمونو الوزولې دي او د سیمې خلکو ته یې دروند مالي زیان اړولی دی.
په یوه بل خبر کې ویل شوي چې تیره ورځ مازدیګر مهال د امریکایي ځواکونو بې پیلوټه الوتکې دهرات ولایت د شینډنډ ولسوالۍ اړوند د “سیاسار“ په سیمه کې دملکي خلکو په یوه موټرسایکل برید کړی چې له امله یې موټرسایکل ویجاړ او ورباندي سپاره ۲ تنه کلیوال ځای پرځای شهیدان شوي دي.
دا پیښې داسې مهال مخته راځي چې په عین حال کې د هیواد په ګڼو ولایتونو کې د حکومت او بهرنیانو له خوا پر ولسي میشت ځایونو بې ساري هدفي بریدونه روان دي چې حکومت او بهرنیان یې د خپلو تازه عملیاتو لړۍ بولي، خو طالبان وایي چې حکومت د دې پرځای چې د ملکي تلفاتو په مټ پر دوی فشار راوړي، ولسونه نور هم دې ته اړ کوي چې د بهرنیو اشغالګرو پر ضد پاڅون ته ملا وتړي
