(کابل ټکی کام ۱۳۹۷ مرغومی ۱۶)
د افغانستان جمهوري ریاست په یوه خبرپاڼه وایي، عبدالستار سعادت چې په حقوقي چارو کې د ولسمشر ارشد سلاکار وو، د اشرف غني په حکم له دندې ګوښه شوی دی.
په خبرپاڼه کې د نوموړي د ګوښه کیدو د لامل په هکله څه نه دي ویل شوي.
بلخوا بیا ځینې دولتي سرچینې او نوموړي ته نږدې کسان وایي ، ښاغلي سعادت په دې وروستيو کې د ټولنيزو رسنيو له لارې، د ملکی تلفاتو غبرګون کې د حکومتي مشرانو پر خلاف توندې څرګندونې کولې.
نوموړي په یوه پوسټ کې چې پر خپله فسبوک پاڼه یې کړی وو، د زرمت پیښه غندلې وه او زیاته کړې یې وه چې دلته که څوک د ولسونو ژغ پورته کړي، دنده یې له ګواښ سره مخ کیږي.
دا لومړی ځل نه دی چې اشرف غني خپل یو نږدې سلاکار د ملکي تلفاتو د غندلو په جرم له دندې ګوښه کوي، تر دې وړاندې یې هم ګڼ دولتي چارواکي او نږدې متحدین له همدې کبله له دندو شړلي دي.
باید وویل شي چې په دې وروستیو کې د هیواد په ګوټ ګوټ کې د ولسي خلکو مرګ ژوبله بې کچې زیاته شوې او افغان عسکرو د امریکایانو په ملتیا هڅه کوي،په ولسي خلکو داسې هدفمند بریدونه وکړي چې پر طالبانو فشار راوړي.
