(کابل ټکی کام ۱۳۹۷ مرغومی ۱۸)
د پخوانی ولسمشر مرستیال او د جمعیت ګوند غړي له هغه جوړجاړي نه پرده پورته کړې چې د نوموړي او د حنیف اتمر تر منځ پرې توافق شوی دی.
یونس قانوني په یوه غږیز پیغام کې ویلي مونږ د ولسمشر لپاره درۍ مرستيالان غوښتل، اجرايه رياست باید په لومړي وزیري (صدارت) بدل شي او دغه راز د لومړي وزیر او ولسمشر واکونه يې بايد معلوم شي.
نوموړي ویلي، اتمر ورسره ټولې غوښتنې منلې خو ولسمشر غني ورڅخه نټه کړې.
د ده په وینا یې چې اتمر یواځینی شخص دی چې کولی شي غني له ارګ څخه وباسي.
یونس قانوني په دغه غږیز کلیپ کې په ټینګار سره وایي چې هدف یې مرستیالي نه ده او یواځې غواړي، د نظام څرنګوالی تبدیل کړي.
قانوني دغه راز ویلي، له دغې طرحې اسماعیل خان او عطانور هم ملاتړ کړی دی.
هغه ویلي، تر اوسه یې نهایي تصمیم نه دی نیولی خو که دا طرحه اتمر بیرته رد کړه، د جهاد او مقاومت له حوزې نه هم یو کاندید“ احمد ولي مسعود“ لري چې ملاتړ ته به یې دوام ورکړي.
یونس قانوني د جمعیت ګوند پر مشر صلاح الدین رباني تور پورې کړی چې له ډاکټر عبدالله سره یې د ګوند له مشورې پرته اتحاد کړی او دوی ورته خوشبین نه دي.
د دغه غږیز کلیپ تر خپریدو وروسته په ټولنیزو رسنیو کې د غني د پلویانو له خوا پر حنیف اتمر نیوکې زیاتې شوې دي.
حنیف اتمر ته د کمونستي رژیم را په دې خوا د یوې استخباراتي ګمارل شوې څیرې په توګه کتل کیږي، چې له امریکا سره یې امنیتي تړون هم لاسلیک کړ او داځل یې د جمهوري ریاست لپاره ځان نوماند کړی دی.
