(کابل ټکی کام، ۱۳۹۷، سلواغه ۲۰)
له کابله خپرېدونکې ويسا ورځپاڼه په سرمقاله ليکي، په مسکو کې د طالبانو، سياسي ګوندونو استازو او سياستوالو تر منځ جوړه شوې غونډه د نهه ماده يي پرېړه ليک په خپرېدو پای ته ورسېده خو حکومت يې مخالفت ته بډې ووهلې.
د ليکوال په وينا، دغه غونډې ته د حکومت استازی نه و وربلل شوی زياتوي د اشرف غني حکومت په دې ورځو کې نه د امريکايانو غونډو کې ځای لري او نه د طالبانو.
ورځپاڼه ليکي، حکومت د مسکو غونډې په اړه تر اندازې زيات منفي تبليغات وکړل زياتوي حکومت او په تيره اشرف غني ځکه بې ځايه مخالفت او ځان خولې کاوه (که په طبیعي ډول ناکامه هم شي تور او زیان دواړه یې د بې کفایته چارواکیو د پزې پېزوان دی او که بریالۍ شي هم یو پېغور به خامخا ورته پاتې وي).
ورځپاڼه ليکي، د غني او عبدالله ګډ حکومت نيمګړې واکمني ده چې خاوره يې له طالبانو سر او واک يې په خپلو کې ويشل شوی په وينا يې بيا هم دغه حکومت که وغواړي د سولې په مخکې خنډ جوړيدای شي چې ښکاره بيلګه کې ملګرو ملتونو کې د طالبانو د سفرونو په اړه شکایت دی زياتوي ” کوم حکومت چې د ولس د برخلیک او د خپلو خلکو د مرګ او ژوند نه بې پروا شي هغه د ولس او هېواد د برخلیک خلا ف د هرې پرېکړې جرئت لري او دې حکومت همدغسې پرېکړې ډېرې کړې دي”.
