جرمني طالبانو ته د دوهم بُن کنفرانس جوړولو وړانديز کړی
(کابل ټکی کام، ۱۳۹۷، سلواغه ۲۹)
طالبانو ته نږدې سرچينې وايي، جرمني له طالبانو سره اړيکې لري او هغوی ته يې د دوهم بُن کنفرانس د جوړولو وړانديز کړی دی.
د سرچينې په وينا، جرمني هڅې پيل کړي څو په افغان سوله کې همکاري وکړي او تر دې مخکې يې څو ځلې طالبانو ته په خپل هېواد کې د دفتر پرانيستو هم ويلي ترڅو له جرمني خپل سياسي مسائل مطرح کړي.
ويل کېږي، د بُن دوهم کنفرانس جوړولو لپاره جرمني چمتووالی نیسي او په همدې تړاو يې ښکيلو غاړو سره خبرې کړي دي.
تر اوسه طالبانو په دې تړاو څه نه دي ويلي.
خو د جرمني د بهرنيو چارو وزارت وياند رينيرو برول د تيرې جمعې په ورځ شپېګل مجې ته ويلي و، جرمني هڅه کوي د طالبانو او افغان حکومت تر منځ د سولې غونډه جوړه کړي او د دغه ډول غونډې جوړولو لپاره يوه طرحه هم چمتو شوې ده.
جرمني دا مهال په افغانستنا کې دوولس سوه عسکر لري او څه موده وړاندې يې د خپلو عسکرو د يو کال لپاره د وخت د تمديدو خبرو ورکړ خو تر اوسه وروستۍ پريکړه نه ده شوې.
دغه راز تيره ورځ د جرمني لومړۍ وزيرې انګيلاميرکل چې د مونيخ په کنفرانس کې يې خبرې کولې وويل: که امريکا خپل ځواکونه له افغانستانه اوباسي نو دوی به هم خپل عسکر د جګړې په اور کې یوازې پرېنږدې او دغه هېواد به خوشې کړي.
د امریکا ولسمشر ډونالډ ټرمپ وړاندې تر دې په افغانستان کې د خپلو ځواوکونو د کمولو اعلان وکړاو یو ځل بيا يې وويل، که امریکا طالبانو سره يوې موافقې ته ورسېږي نو له دغه هېواده به ټول امریکايي عسکر اوباسي.
