(کابل ټکی کام ۱۳۹۷ سلواغه ۳۰)
د ولسي جرګې په تیرو ټاکنو کې ښځینه نوماندانې ادعا کوي چې د کمپاین پر مهال او وروسته د مسؤلینو او نورو خلکو له خوا ورسره د جنسي اړیکو د نیولو هڅې شوې دي.
د کابل څخه نومانده ویدا ساغري په نوم یوې وکیلې چې اوس په ټاکنو کې هم پاتې راغلې، وایي، ډیری رایې یې له سړیو ترلاسه کړې چې زیاتره یې هغه کسان وو ، چې له دې سره یې د جنسي اړیکو د نیولو هڅه کړې وه.
نوموړې له یوه مسؤل سره د خپلو اړیکو په تړاو ویلي“ هغه راغی، خوشاله شوم چې بالاخره داسې څوک راغی چې ماته یوه ښه مشوره راکړي، کله چې کیناست راته یې کړه؛ یواځې یوه مچکه راکړه! ټول کار دې جوړوم“
نوموړې زیاتوي، خلکو مخامخ هم ازارولم او په تلیفونونو کې یې هم ناوړه جنسي خبري راته کولې چې دې کار زه سخته خجالت کولم
له بغلان ولایت څخه هم نومانده مستوره ارزو چې د ورزش کارانو په استازیتوب یې ځان نوماند کړی وو، وایي، د سړیو لخوا د جنسي خبرو اترو او دغه راز د خلکو له ناوړه چلند له امله ډیره په تنګ راغلې وه.
هغه زیاتوي، د طالبانو سیمې ته د ورتګ پر مهال یې چادري په سر کوله په داسې حال کې چې پخوا یې هیڅ کله چادري نه وه اغوستې.
مستوره وایي،“ د کمپاینونو پرمهال ډیری خلک له دې امله راته راتلل چې زه یوه ځوانه نجلۍ یم او له ما سره وګوري او نمبر مې واخلي؛ چا چې یې نمبر اخیستی لا هم راسره اړیکه پالي او تماسونه نیسي.“
د هیواد په ټولو ولایاتو کې تر ۴۰۰ ډیرې میرمنې د ولسي جرګې ټاکنو ته نوماندانې وې چې زیاتره یې په انتخاباتي بهیر کې له یو نه، یو ډول جنسي ځورونې سره مخ شوې دي
څو اونۍ وړاندې داسې راپورونه هم ورکول شول چې د انتخاباتي کمیسیونونو کمیشنرانو هم د بریالتوب په بدل کې له زیات شمیر ښځینه نوماندانو د جنسي اړیکو د نیولو غوښتنه کړې وه.
