(کابل ټکی کام ۱۳۹۷ کب ۱)
د ترانسپورټي شرکتونو اتحادیه وایي، په ټول هیواد کې یې کاري اعتصاب پیل کړی او فعالیتونه یې درولي دي.
اتحادیه ددغه اعتصاب لامل په لوړه کچه دولتي فساد بولي چې په وینا یې د ترانسپورټ وزارت، د ترافیکو ریاست، د مالیې وزارت، د کورنیو چارو وزارت او د ټولګټو چارو وزارت په کې دخیل دي او په یوه نه یوه ډول له موټروانانو ناقانونه پیسې شکوي.
دوی خبرداری ورکوي، تر هغو چې یې غوښتنې ونه منل شي، خپل اعتصاب ته به دوام ورکړي.
د دغې اتحادیې مرستیال مشر وایي“ مونږ له جمهور رئیس نه غواړو چې زمونږ ستومزې حل کړي؛ که چیرته دغه وضعیت دوام وکړ، مونږ به په ټولو برخو کې خپل فعالیتونه ودروو.“
د عبدالصبور په نوم یوموټر چلوونکی وایي، پر هره تله پولیس، ترانسپورټ او ښاروالي له مونږ نه پیسې اخلي، زمونږ زړونه یې له کار او ژوند نه راتور کړی دي.
په همهاله توګه د کابل – کندهار لویه لار هم بار وړونکو موټرو د مالکینو او موټروانانو لخوا تړل شوې او خبرداری یې ورکړی، تر هغو چې یې ستونزې نه وي منل شوې لاره نه پرانیزي.
موټروانان وایي، خط سیر، کتابچې، ښاروالۍ او د توکو د تللو تراز، ټول ورته سردرد جوړ شوی او ځای پرځای ورڅخه پیسې اخیستل کیږي.
خو د ټولګټو چارو وزارت وایي چې هڅه کوي دغه ستونزه د خبرو له لارې حل کړي او زیاتوي، کاري اعتصاب د خلکو خپل حق دی.
