کابل ټکی کام (پنجشنبه، ۲۳کب، ۱۳۹۷ل):
په قطر کې د طالبانو د سياسي دفتر مشر او د شيخ الحديث هبة الله اخندزاده سياسي مرستيال ملا عبدالغني برادر ويلي دي چې له راتلونکي افغانستان څخه دې هيڅوک ويره نه لري او دا هيواد د ټولو افغانانو ګډ کور دی.
نوموړي د طالبانو له رسمي ويب پاڼې (الاماره) سره په لومړنۍ ځانګړې مرکه کې ويلي دي چې له راتلونکي افغانستان څخه دې هيڅوک ويره نه لري او له افغانستان څخه به د سيمې هيوادونو او نړۍ ته هيڅ خطر نه پيښيږي.
ملا برادر په دې مرکه کې د قطر د وروستۍ ناستې په اړه ويلي دي چې مذاکرت ښه وو او له امريکايانو سره په خبرو کې پرمختګ شوی دی او تمه يې څرګنده کړې ده چې په راتلونکې کې به نورو پرمختګونو ته هم لاره هواره شي او په افغانستان کې به سوله، اسلامي نظامي او د افغانانو ترمنځ د ورورلۍ فضاء رامنځته شي.
نوموړي ويلي دي چې له امريکايانو سره په مذاکراتو کې له خپل دريځ او موقف څخه نه دي په شا شوي او تر اوسه په خپلو پخوانيو دريځونو ټينګ پاتې دي.
هغه افغانانو ته ډاډ ورکړی دی چې د خپل راتلونکې په اړه هيڅ تشويش ونه لري او له طالبانو سره د تبعيض او غچ اخيستنې فکر نشته او په ټولو به رحم وشي او زياته کړې يې ده هغه څوک چې له طالبانو سره تفاهم وکړي، غدر او دښمني ونه کړي نو دوی به يې د خپلو ورونو په څېر وګڼي.
ملا برادر له امريکايانو سره د طالبانو د مذاکراتي ټيم په اړه وويل چې په ياد ټيم پوره باور لري او ټول غړي يې علماء دي، قوي او باتجربه خلک دي.
ښاغلي برادر په دې مرکه کې ويلي دي چې دوی له بل هر چا د هيواد د علمي، ملي او جهادي شخصيتونو په قدر ښه پوهيږي او له دوی سره به ښه چلند کيږي.
هغه له ګاونډيو او نړيوالو سره د اړيکو په اړه ويلي دي چې غواړي له ګاونډيو، د سيمې او نړۍ له هيوادونو سره د ښې اړيکې ولري او هيچا ته د زيان رسولو اراده نه لري او نه يې تر دې وړاندې هم چاته زيان رسولی دی.
ملا عبدالغني برادر په طالبانو غږ کړی دی چې تکبر او غرور ونه کړي، د وروستيو پرمختګونو په اړه د الله تعالی شکر اداء کړي او د ولس مشران خپل پلرونه، همزولي ورونه او کشران د خپلو بچيانو په څېر وګڼي.
