جواد څارګر
سرګردان پښتو ژبه کې دیوه خندني سیریال نوم دی چې د کوزې پښتونخوا مشهور او کامیډینو څېرو کار په کې کړی دی
زه چې دې وروستیو تحولاتو کې د اشرف غني د رژیم کردار او هڅو ته وګورم ، کټ مټ د سرګردان سیریال تکرار راته ښکاره شي
دا نو خدای ددوی پرده کړې دي چې واکمني يې تر دغه سیریال را وروسته ده. که چېرې ماقبل وای، سرګردان سیریال به ددوی د رژیم تمثیل بلل کېده
په سرګردان کې یو کرکټر دکلاشنکوف ماما په نوم شهرت لري. خوریونه يې (دخور زامن) راشنکوف ماما ورته وایي
دراشنکوف ماما کردار لکه ډاکتر صاحب غني؛ هره خبره يې د ځان په صفت پیلیږي او هره خبره کې جرمن، هټلر او دخپلو درواغجنو مېړانو یادؤنه کوي
راشنکوف ماما دپاکستان تر جوړښت وړاندې زمانه کې جرمني(المان) ته تللی وي چې هلته په پوځي لیکو کې د طباخ (اشپز) دنده اجراء کوي خو کلي کې خلکو ته وایي چې جرمني کې د هټلر په پوځ کې جنرال ؤ او ټول جنګونه ده ورته ګټلي دي
په یوه موقع راشنکوف ماما کور کې خوریونو ته دخپل شهامت! داستان اوروي؛ یوه ورځ یو ځای کې ډېر سخت محاصره شو، ټول پوځیان رانه وتښتېدل او زه یوازې پاته شوم. اچانک مې راشنکوف ته لاس کړ، جاجر (شاجور) مې ور بدل کړ او پوځیانو ته نېغ ودرېدم او دګولو (مرمیو) باران مې پې درله جوړ کړ …..
په همدې خبرو کې له کوره بهر هوایي ډزې وشي. راشنکوف ماما له کټه ټوپ کړي ورلاندې پټ شي او چیغې جوړې کړي چې هلۍ په ګولۍ ولګېدم
خوریونه ورته وایي ماما هوایي فایر ؤ، ته ټارګټ نه وې. ورته وایي غلي شئ ساده ګانو زه لا توده کې یم، ما جرمن ډزولی دی او شپږ شلې جنګونو کې مې برخه اخیستې ده
راشنکوف لکه ارګ مشر؛ نه يې څوک د تفکر له معیار خبر دي، نه له دې چې چېرې او په کوم معیار دنړۍ دوهم مفکر جوړ شو؟!
چا انتخاب کړ؟!
لومړی مفکر څوک دی او درېیم څوک دی؟!
دتفکر لقب کومه ازموینه لري او یو څوک پر کومو معیارونو مفکر بلل کېدلای شي؟!
راشنکوف ماما لکه ارګ ته ورټول ماشومان او مشر ئې؛ ټول تمرکز ئې پر خپل صفت دی او ټول عمر پر همدې شخوند وهي. دکلي سادګان او کور کې خور او خوریونو ته باټې غږؤي او پر همدې خپله ګېډه غوړه ساتي
راشنکوف ماما دډاکتر غني سره یو بل ورته والی هم لري. د راشنکوف ماما د خېل خانې درک هم نشته دی او دخور کور کې اوسیږي، همداسې لکه ډاکټر غني چې یوه رولا غني له ځانه سره راوستې ده نور يې د هېڅ درک او سرک نشته،
له راشنکوف همدغه درې خوریونه او خور تاؤ دي او له غني هم. دراشنکوف ماما مشر خوریا شهزاده، دوهم ګلزاده او درېیم حسین زاده نومېږي
شهزاده لکه اسدالله خالد د رجولیت ساز او سامان هېڅ نه لري؛ ټوله تکیا په اضافي بګتیو او بازاري دنداسو او سورخي سفیدو کوي، مګر ځان ورته دکوه قاف شهزاده ښکاري او داسې انګیري چې دکلي او ښار ټولې نجونې ده پسې غرقې لیونیانې دي. دا په داسې حال کې چې شهزاده ته کله کوژدنه کوي نو خسرګنۍ ته يې ګلزاده ورښکاره کوي.
ګلزاده بیا لکه امرالله صالح ډېر چوتار او ماهر لوبغاړی دی؛ هر څه کې خپله ګټه لټوي، بې له ګټې هیڅ ګام نه اخلي. دځان پرګټه تاؤان ډېر ښه پوهېږي، ان دخپلې ګټې لپاره ټولې رشتې او یارانې قربانوي اما له خپلې ګټې نه تېرېږي او د ماما ‘راشنکوف ماما’ هره خبره په ریشخند او خندا اخلي
حسین زاده لکه څرنګه چې په تولد کې درېیم دی په کردار کې هم لکه درېیم جنس؛ همهغسې دنرښځیانو حرکات او خبرې کوې تر دې چې د شهزاده اپلتو ته هم سر خوځوي. ماما ورته په حقیقت کې یو ستر زړؤر او جنګېدلی سړی ښکاري
حسین زاده په دې تمه پر خپلو مشرانو نیوکه نه کوي چې ګوندې واده يې ور ونه ځنډوي او بېچاره وخت ناوخت ډوډۍ پخولو ته پر ناسته داسې سوچ پسې واخلي چې د واده ګلونه غاړه کې پراته وویني …
دراشنکوف ماما (غني) ماشوم سلاکار حمدالله محب په ارګ کې کټ مټ دحسین زاده کردار پر مخ وړي. ټولې خبرې يې مشرانو ته غوړه مالي ده، که څه هم دده خپل حیثیت په کې لمنځه درومي خو بېچاره ته غوړې او ژېړې هیلې ورکړل شوي دي، اوس په سوچونو کې ځان د ارګ راتلونکی راجا ویني او غوږونو کې يې د(زرکلن شې) رهبره انګازې انعکاس کوي.
څو ورځې وړاندې ارګ کې دغني، ستانکزي، صالح، خالد او محب ترمابین ناسته وشؤه چې په پایله کې د طالبانو پر ضد د خالد په نوم عملیات اعلان شؤل. دا هم په داسې حال کې چې تر اوږدې جګړې وروسته دسولې هیلې را ټوکېدلې دي او د ښکېلو خواوو تر مابین تاودې خبرې رؤانې دي، مګر د ارګ راشنکوف ماما او خوریونه يې له خپلو باټو او ډوزو نه تېرېږي، جګړئیز منطق غږوي او له هرې ممکنې لارې د سولې د تخریب هڅې کوي
دوی باید وپوهېږي چې دسولې د تخریب په هڅو کې محض خپل شخصیتونه تخریبوي او بایلي. افغان ملت ته د رارؤانې نېکمرغۍ او ویاړمنې سوبې او سوکالۍ مخ ته خنډونه نشي جوېدلای ان شاءالله العزیز.
دسرلوړي، ښېرازه او اسلامي افغانستان په هیله
