(کابل ټکی کام، ۱۳۹۸، وری ۵)
تيره شپه د هلمند ولايت په مارجې ولسوالۍ کې طالبانو د سرحدي عسکرو پر يوه مرکز بريد کړی چې په ترڅ کې يې لسګونه عسکرو ته مرګ ژوبله اوښتې ده.
د طالبانو وياند قاري يوسف احمدي په خپله ټويټر پاڼه ليکي، د يادې ولسوالۍ مربوط د تريخ نارو د سميټي سيمه کې يې د سرحدي عسکرو د قطعې مرکز نيولی او پنځه عسکر پکې وژل شوي دي.
نوموړی وايي، په دغه بريد کې اته عسکر ټپيان شوي او په زياته اندازه وسلې او مهمات د طالبانو لاسته ورغلي دي.
ځايي امنيتي سرچينې دغه بريد تاييدوي په وينا يې چې په ياده جګړه کې عسکرو ته درنه مرګ ژوبله اوښتې خو کره معلومات په لاس کې نه لري.
تر اوسه د هلمند ولايتي چارواکو په دې اړه په رسمي ډول څه نه دي ويلي.
طالبانو د پسرلي له پیليدو سره خپلو بريدونو ته زور ورکړی او په دوامداره توګه له دولتي ځواکونو د سيمو، پوستو او نظامي اډو د نيولو خبرونه ورکوي.
