ننګرهار: د ګډو ځواکونو عملياتو کې پنځه ملکيان وژل شوي
(کابل ټکی کام، ۱۳۹۸، وری ۶)
د ننګرهار ولايت په شيرزادو ولسوالۍ کې د ګډو ځواکونو د عملياتو په ترڅ کې پنځو تنو ملکي وګړو ته مالي او ځاني زيان اړولی دی.
د خوګياڼيو ولسوالۍ اوسېدونکي وايي، دغه عمليات بيګا شپه د طوطو په سيمه کې شوي دي چې عملياتي عسکرو د پلټنو پر مهال د يو شمير کورونو دروازې ماتې کړي او شپږ کورونه يې په بشپړه توګه په بمونو ویجاړ کړي دي.
ځايي خلک وايي، د ګډو ځواکونو په ډزو پنځه تنه ملکي کسان چې ښځې او ماشومان هم پکې دي وژل شوي زياتوي چې د پلټنو پر مهال د دوی قيمتي توکي، پيسې او زيورات يې هم وړي دي.
تر اوسه د ننګرهار ولايتي چارواکو په دې اړه څه نه دي ويلي.
طالبانو د ګډو ځواکونو دغه عمل وحشت او جنايت بللی او وياند يې ذبیح الله مجاهد په يوه خبرپاڼه کې ويلي ” دغه راز وحشت د امریکايي اشغالګرو او دکابل ادارې د غلامو عسکرو روزمره شغل ګرځيدلی چې ورسره د افغان غیرتي اولس حساسیت را پاریدلی او د دښمن په وړاندې د مجاهدینو عملیاتو هم زور اخیستی”.
دا په داسې حال کې ده چې درې ورځې مخکې هم ګډو ځواکونو د کندز په تلوکه سيمه کې عملياتو پر مهال د ښځو او ماشومانو په شمول ديارلس ملکيان وژلي و.
د ګډو ځواکونو له خوا د ملکي خلکو د وژل کيدو لړۍ له تيرو څو میاشتو راهيسې روانه ده خو تر دې دمه د ګډ حکومت چارواکي په اړه هيڅ غبرګون نه ښيي.
