لیکنه : موسی مهاجر
د ۲۰۱۴ کال په پای کې د ناټو د جګړه ييز ماموریت تر پای ته رسيدلو او د جګړې له لومړۍ لیکې د ناټو د عسکرو د شاتګ تر اعلانيدلو وروسته امریکايي ولس داسې انګېرله، چې نور د جګړې پيټی د دوی له ملا څخه پورته شو، نور به دوی له افغانستان څخه د خپلو عسکرو د وژل کيدلو غمجن خبرونه ترلاسه نه کړي او نه به هم په خپلو عسکرو له دې امله دغم اوښکې توی کړي، چې هغوی په افغانستان کې وژل شوي او نه به دې ته اړتیا پيدا شي، چې د تیر په څېر د خپلو عسکرو د تابوتونو هرکلي ته د امریکا هوايي ډګرونو ته د ورتللو زحمت وباسي.
خو د کابل له رژیم سره په امنیتي تړون کې امریکايي پوځیانو ته د عملیاتو د ترسره کولو او په جګړو کې د برخې اخیستلو اجازې، تیر کال د اشرف غني له لوري له امریکايي پوځیانو څخه دشپنیو عملیاتو د ترسره کولو غوښتنې او د جګړې په ډګر کې د کابل د رژیم ماتې د امریکا جګړه مار پوځیان په جګړه کې یوځل بیا ښکېل کړل او له همدې امله د امریکا له لوري د جګړې په دغه بل کړای شوي اور کې لا هم امریکايي پوځیان د اور د خاشاکو په څېر سوځي.
که د لسګونو زرو پوځیانو په کمولو سره امریکا د خپلو تلفاتو او مالي زیانونو د کمولو کوښښ کړی، خو وروستیو بریدونو او تلفاتو امریکایان له دې تریخ حقیقت سره مخ کړل، چې لا هم افغانستان د دوی لپاره د مرګ کنده ده، ځکه امریکایانو ته نه یوازې د جګړې ډګر بلکه خپل خوندي مرکزونه هم ورته په جهنم بدل شوي دي.
د ۲۰۱۵ کال ددسمبر په ۲۱ نېټه د امریکا د عمومي قومندانۍ ستر مرکز باګرام هوايي ډګر ته څېرمه يوه فدايي برید د ۱۹ امریکايي پوځیانو ژوند واخیست، چې په ۶ تنو خپله امریکایانو هم اعتراف وکړ، د تیرکال په ترڅ کې دغه ستر وژونکي برید په امریکایانو کې یو ځل بیاله دې امله سختې اندېښنې را وپارولې، چې د دوی بچیان په یوه داسې جګړه کې لا وژل کيږي، چې ظاهرا پای ته رسيدلې ده.
له دغې وژونکې حملې څو ورځې وروسته د وژل شویو امریکایانو تابوتونه د امریکا« نیوکاسل» هوايي ډګر ته په داسې مهال ورسول شول، چې هلته يې زیات شمېر امریکایانو په اوښلنو سترګو د را رسيدلو انتظار کاوو او د دغو عسکرو وژل کیدلو د هغوی د کورنیو او خپلو خپلوانو د کرسمس مراسم ور په غم او د هغوی په زړونو کې يې تل پاته داغ ور پرېښود.
د دغه برید ویر لا په امریکایي کورنیو کې تازه و، چې د روانې میاشتې په ۴ نېټه د کابل د هوايي ډګر ختیځه برخه کې د امریکایانو او اروپایانو په پوځي کېمپونو باندې ستر انغماسي برید ترسره شو، د بريد هدف په کابل کې ډیره مهمه سیمه وه، چې امنیت يې د امریکا د سفارت د اړوندو ساتونکو له لوري ساتل کیږي او د سلګونو بهرنیو پوځیانو، استخباراتي کارکونکو ترڅنګ ۳۵۰ خارجي ديپلوماتان پکې اوسیدل او دغه اتلوال فدايي برید د بهرنیانو دوه کېمپونه «کمالات او سنین» په بشپړه توګه ويجاړ او سلګونو پوځیانو، اسختباراتي کارکونکو او ديپلوماتانو ته یې مرګ ژوبله واړوله، لسګونه غربي اشغالګر يې دخپلو خوندي کېمپونو تر ودانیو لاندې او غوښې او هډوکي یې د نړېدلو ودانیو له خاورو سره ورګډ کړل.
که څه هم امریکایانو د دې سترې چاودنې په تلفاتو ځانونه غلي کړل، خو د دغو کېمپونو دیوه مالک له قوله، چې د پيښې ځای یې له نږدې څخه لیدلی او بیا يې له ازادۍ رادیو سره مرکه کوله وویل، چې په دغې چاودنه کې په زیات شمېر کې بهرنیان وژل شوي او د هغه په خبره، چې بهرنیان زیات تلفات لري او یو شمېر يې د کمپ د یوه ورزشي کلب تر نړيدلي چت لاندې شوي دي، نوموړی چې د چاودنې څخه لږ وروسته غږیدو وویل، چې تراوسه د ۳۰ تنو جسدونه د چورلکو په وسیله ليږدول شوي او د نورو ډیرو وژل شویو عسکرو د ليږد لړۍ روانه ده، د مړو او ټپیانو د ليږد له چورلکو او له تخریب شویو ودانیو څخه داسې څرګندیږي، چې تلفات په سلګونو دي او کيدلی شي امریکایان څو ورځې وروسته په خپلو تلفاتو اعتراف وکړي.
د کابل په چاودنه کې د وژل شویو عسکرو، استخباراتي کارکونکو او ديپلوماتانو تابوتونه لا امریکا ته نه و رسيدلي، چې د مارجې جګړې یو ځل بیا امریکايي عسکرو ته د۲۰۱۰ کال د مارجې د ترخو ورځو یاد او ویرجنې خاطرې ور په یاد کړې او د هغوی پخوانی قتل ځای یو ځل بیا د هغوی په وینو رنګ شو.
